ევროპული საბჭოს პრეზიდენტმა ჰერმან ვან რომპეიმ და ევროკომისიის პრეზიდენტმა ჟოზე მანუელ ბაროზომ ყირიმის რეფერენდუმის თაობაზე ერთობლივი განცხადება გაავრცელეს.
როგორც ევროკავშირის 28 ქვეყნის მთავრობების სახელით გაკეთებულ განცხადებაშია ნათქვამი, ევროკავშირი თვლის, რომ რეფერენდუმის ჩატარება ყირიმის მომავალ სტატუსზე უკრაინის კონსტიტუციისა და საერთაშორისო სამართლის დარღვევაა.
"რეფერენდუმი არაკანონიერი და არალეგიტიმურია და მისი შედეგები არ იქნება აღიარებული. კრიზისიდან გამოსავალი გზა უნდა ეფუძნებოდეს უკრაინის ტერიტორიულ მთლიანობას, სუვერენიტეტსა და დამოუკიდებლობას, უკრაინის კონსტიტუციისა და საერთაშორისო სტანდარტების მკაცრი შესრულების ჩარჩოებში.
მხოლოდ ერთად მუშაობით, დიპლომატიური პროცესის მეშვეობით, მათ შორის პირდაპირი მოლაპარაკებებით უკრაინისა და რუსეთის მთავრობებს შორის, შევძლებთ კრიზისიდან გამოსავალი გზის მოძებნას. ევროკავშირს განსაკუთრებული პასუხისმგებლობა აკისრია მშვიდობისა და სტაბილურობის დამყარებაში ევროპის კონტინენტზე და ის გააგრძელებს ამ მიზნების მიღწევას ყველა არსებული საშუალების გამოყენებით.
ჩვენ კვლავ ვგმობთ უკრაინის ტერიტორიული მთლიანობისა და სუვერენიტეტის შელახვას და მოვუწოდებთ რუსეთს, თავისი შეიარაღებული ძალები კრიზისამდე არსებულ რაოდენობამდე დაიყვანოს და მოახდინოს მათი გადაყვანა მუდმივი დისლოცირების ადგილზე, როგორც გათვალისწინებულია სათანადო ხელშეკრულებებით", - ნათქვამია განცხადებაში.
