2020-04-20 12:41

ევროპული საქართველოს“ წევრი, ოთარ კახიძე აცხადებს, რომ არ გამორიცხავს, ბაჩო ქათამაძე, რომელმაც „მიხეილ სააკაშვილის სახელობის საპრეზიდენტო ბიბლიოთეკაში“ ხანძარი გააჩინა, რომელიმე უწყების დავალებას ასრულებდა.

მისივე შეფასებით, ბაჩო ქათამაძე ხელისუფლების წაქეზების მოქმედებს, რაც მის დაუსჯელობაში გამოიხატა.

„ბაჩო ქათამაძე ხელისუფლებას უნდა დაეკავებინა ნიკა გვარამიაზე თავდასხმის შემდგომ. ვინაიდან გარდა იმისა, რომ თავად ქმედება იყო დანაშაულებრივი, იყო ნასამართლევი და პირობითი მსჯავრის დროს. ეს რომ მომხდარიყო, ბიბლიოთეკას ვეღარ გადაწვავდა ეს ბოროტმოქმედი. თუმცა, ხელისუფლებამ ეს არ გააკეთა, რაც გვაფიქრებინებს, რომ იგი სწორედ ხელისუფლების წაქეზებით მოქმედი პირია. როგორც მინიმუმ, ეს წაქეზება მის დაუსჯელობაში გამოიხატა, თუმცა, შესაძლოა, დავალებასაც კი ასრულებდა რომელიმე უწყების. რაც შეეხება დაკავების შემდგომ ღონისძიებებს, მთავარია თვალყური მივადევნოთ რამდენად მოხდება მასზე კანონის სრული სიმკაცრით პასუხისმგებლობის დაკისრება“,-აღნიშნა ოთარ კახიძემ.

ცნობისთვის, 19 აპრილს თბილისში, „მიხეილ სააკაშვილის საპრეზიდენტო ბიბლიოთეკაში" ხანძარი გაჩნდა. მოგვიანებით, სოციალურ ქსელში გავრცელდა ვიდეო, სადაც ახალგაზრდა მამაკაცი „ფეიქსბუქის" პირდაპირ ეთერში ამბობს, რომ შენობის „დემონტაჟს აკეთებს". ამის შემდეგ კი აჩვენებს კადრს, სადაც მის უკან შენობას ცეცხლი უკიდია. პოლიციამ მიხეილ სააკაშვილის სახელობის საპრეზიდენტო ბიბლიოთეკაში ხანძრის გაჩენის ფაქტზე ერთი პირი უკვე დააკავა. შსს-ს ინფორმაციით, გამოძიება საქართველოს სსკ-ის 187-ე მუხლის მე-2 ნაწილის "ა" ქვეპუნქტით მიმდინარეობს, რაც ცეცხლის წაკიდებით ნივთის დაზიანების ან განადგურებას გულისხმობს.