2020-04-20 11:52

აჭარაში კორონავირუსის ერთი ახალი შემთხვევა გამოვლინდა, რომელიც ე.წ. ქობულეთის კლასტერს უკავშირდება, - ამის შესახებ აჭარის ჯანდაცვის მინისტრის მოადგილე, ნინო ნიჟარაძემ ჟურნალისტებს განუცხადა. მისი ინფორმაციით, ინფიცირებული ქალი თვითიზოლაციაში იმყოფებოდა. რაც შეეხება მის ოჯახს, ისინი საკარტინო სივრცეში არიან.

„დილის ინფორმაციით, ერთი ლაბორატორიულად დადასტურებული შემთხვევა გვაქვს. იგი ე.წ. ქობულეთის კლასტერთან არის დაკავშირებული. ინფიცირებული 10 დღის განმავლობაში საკუთარ ოჯახში თვითიზოლაციაში იმყოფებოდა.

ინფიცირებული კლინიკა „მედალფაშია" გადაყვანილი, მისი ოჯახის წევრები კი საკარანტინო სივრცეში არიან მოთავსებული.

დღის განმავლობაში ამ ოჯახის ახლო კონტაქტებს, ყველას ჩაუტარდება ლაბორატორიული კვლევა ინფიცირებული ქალი არის საშუალოზე მსუბუქი გამოხატულებით. მას ჩივილები გუშინ წინ, ღამით დაეწყო“, - განაცხადა ნიჟარაძემ.

მისივე ინფორმაციით, გუშინ 5 გამოჯანმრთელებული პირი დაემატათ და ამ ხუთიდან სამი დღეს დატოვებს კლინიკას.

„ჯამში კლინიკა „მედალფაში“ 34 დადასტურებული შემთხვევა მკურნალობს, მას ერთი დაემატა. რაც შეეხება ქობულეთის კლასტერს, ქობულეთში დარჩენილი კონტაქტების ნიმუშების აღებას ვფიქრობთ, ზოგიერთთან სწრაფი ტესტის ჩატარებაც მოხდება. ჩვენი ძირითადი მიზანია, დარჩენილი კონტაქტების შესწავლა. ყველას მდგომარეობა არის კონტროლს ქვეშ“, - აცხადებს ნინო ნიჟარაძე.