2014-03-05 21:33

რუსეთის თავდაცვის მინისტრი აცხადებს, რომ ყირიმის ნახევარკუნძულზე რუსეთის შეიარაღებული ძალები არც გადაადგილდებიან და არც უკრაინის სამხედრო ბაზებს ბლოკავენ.

ამის შესახებ სერგეი შოიგუმ ჟურნალისტებს უთხრა და აღნიშნა, რომ რუსეთის ჯარების ყირიმის ნახევარკუნძულზე ყოფნის ფაქტი სიცრუეა.

მანვე განაცხადა, რომ „წარმოდგენა არა აქვს“, საიდან ჰყავთ ყირიმში „სახალხო თავდაცვითი რაზმების“ (როგორც რუსეთის ოფიციალური პირები უწოდებენ) წევრებს რუსულ შეიარაღებაში არსებული საბრძოლო ჯავშანმობილები „ტიგრი“ და „რისი“.

შეგახსენებთ, რომ ინტერნეტში არაერთხელ გამოქვეყნდა ფოტო და ვიდეომასალა, სადაც ნათლად ჩანს, რომ „ტიგრები“, რომლებიც ყირიმში გადაადგილდებიან, რეგიონალური და სახელმწიფო სანომრე ნიშნების მიხედვით, სამხედრო ოლქ „სამხრეთის“ შეიარაღების ტრანსპორტია.