2014-03-04 21:38

 ყირიმში რუსი სამხედროები მაროდიორობით არიან დაკავებულები, ისინი უკრაინის შეიარაღებული ძალების კუთვნილ სამხედრო ავტომანქანებსა და უნიფრომებს ყიდიან.

რუსი სამხედროები, რომელთა ყოფნას ყირიმში რუსეთის პრეზიდენტი პუტინი არ აღიარებდა, უკრაინაში მაროდიორობით იყვნენ დაკავებულნი. სხვადასხვა ადგილებიდან გავრცელებული ინფორმაციით, ისინი ნაძარცვს ყიდიდნენ კიდეც, -ამის შესახებ ინფორმაციას გამოცემა ,,INTV“-ზე დაყრდნობით ,,ცენზორ.ნეტი“ ავრცელებს.

როგორც ტელეფონით თვითმხილველები იტყობინებიან , ყირიმის ავტონომიურ რესპუბლიკაში, ბაზარზე მასობრივად ჰყიდიან უკრაინის არმიის, მოპარულ სამხედრო ფორმებს. ინფორმაცია ვრცელდება როგორც სიმფეროპოლიდან, პერევალნოედან , ფეოდოსიიდან, ასევე ,,რუსეთის მადიდებლებით დასახლებულ“ ქალაქ სევასტოპოლიდანაც.

თვითმხილველების თქმით, გამყიდველები იყენებენ კამუფლიაჟს, ცდილობენ დაემსგავსონ იქაურებს, რათა დამალონ, რომ რუსები არიან.

გამოცემის წყაროების ცნობით, უნიფორმის კომპლექტის ფასი 50 გრივნაა.

ამ ფონზე უკრაინის სხვადასხვა ფორუმებსა და ვიდეოპორტალებზე ხშირად შეხვდებით 2008 წლის რუსეთ-საქართველოს ომში რუსი სამხედროების მაროდიორობის დამადასტურებელ ფოტო-ვიდეომასალას - უკრაინელები რუსების ქმედების გამო საქართველოსთან კიდევ ერთ პარალელს ავლებენ.