2014-03-03 14:52

იმის მიუხედავად, რომ 2 მარტიდან უკრაინამ ოფიციალურად დაკეტა საჰაერო სივრცე არასამოქალაქო დანიშნულების საფრენი აპარატებისთვის, ორმა რუსულმა Су-27-მა უკრაინის საჰაერო სივრცე დაარღვია.

ავიაგამანდგურებლები კრასნოდარიდან აფრინდნენ და რუსეთის საზღვრიდან მელიტოპოლიის რაიონამდე იფრინეს. ამის შესახებ უკრაინული მედია იტყობინება.

რუსეთის ქმედების პასუხად უკრაინის მხარემ ქვეყნის სამხედრო-საჰაერო ძალების კუთვნილი ორი Су-27 -ის აფრენის ბრძანება გასცა. წინასწარი მონაცემებით, რადიოსიხშირეზე რუსი პილოტები ერთმანეთს ესაუბრებოდნენ, რომ „მიზნამდე 80 კილომეტრია“, ხოლო უკრაინის კუთვნილი გამანადგურებლების აფრენის შემდეგ ბაზაზე დაბრუნების ბრძანება მიიღეს.

გამთენიისას უკრაინის საჰაერო სივრცე კიდევ ორმა რუსულმა გამანადგურებელმა დაარღვია, რომელთა შესახვედრად უკრაინის კუთვნილი ორი Су-27 ისევ აფრინდა. ამის შემდეგ რუსულმა გამანადგურებლებმა კიდევ ერთხელ შეიცვალეს კურსი და უკრაინის საჰაერო სივრცე დატოვეს.