2014-03-01 14:10

საქართველოს განათლებისა და თავდაცვის ყოფილი მინისტრი, „რეფორმატორთა კლუბის“ დამაარსებელი დიმიტრი შაშკინი წერს, რომ დასავლეთმა ახლავე უნდა გადადგას სამი ნაბიჯი, რითაც „რუსეთს თავის ადგილზე დასვამს“.

დიმიტრი შაშკინი იხსენებს 2011 წლის რუსულ გეგმას და აცხადებს, რომ სწორედ ამ გეგმის ჩაშლის გამო ზის ვანო მერაბიშვილი ციხეში:

„ყირიმში არსებული სიტუაცია ერთი-ერთში ჰგავს იმ სცენარს, რომელსაც 2011 წელს რუსეთი საქართველოსთვის ამუშავებდა - კანონიერი ხელისუფლების ჩამოგდება, მარიონეტების დასმა და "მოძმე" რუსეთისთვის ჯარის შეყვანის თაობაზე მიმართვა. ახლა ვანო მერაბიშვილი ციხეში იმისთვის ზის, რომ რუსეთს ეს არ გამოუვიდა.

ჯერ კიდევ 2008 წელს ჩვენ ყველას ვეუბნებოდით, რომ თუ რუსეთს საქართველოში შეჭრა შერჩებოდა, შემდეგი უკრაინა იქნებოდა. 2010 წელს იმავე საკითხზე აფრთხილებდა სარა პეილინი მსოფლიოს.

სამწუხაროდ, ამერიკამ და ევროპამ მხოლოდ ახლა დაიწყეს განცხადებების კეთება და მუქარა, რომ უკრაინაში ინტერვენციისთვის რუსეთი ფასს გადაიხდის... სკეპტიკოსები იტყვიან, რომ ეს მხოლოდ მუქარაა და უკრაინის გამო დასავლეთი რუსეთთან ომს არ დაიწყებს, ისე როგორც საქართველოს გამო არ დაიწყო.

ომის დაწყება არცაა საჭირო. სამი რამ უნდა გააკეთოს ახლავე დასავლეთმა, რომ რუსეთი თავის ადგილას დასვას:

1. გაყინოს რუსი ოლიგარქების ანგარიშები დასავლურ ბანკებში;

2. შეჩერდეს შენგენის ვიზების მოქმედება რუსეთის ყველა მოქალაქისთვის;

3. შეწყდეს რუსეთის ნავთობის შეძენა დასავლური კომპანიების მიერ.

ამის შემდეგ, რუსი ოლიგარქები საკუთარ მთავრობას თავად მიხედავენ. თქვენ შეიძლება თქვათ, რატომ უნდა შეექმნას პრობლემები უბრალო ხალხს?

იმიტომ, რომ მათი მთავრობა ახორციელებს სამხედრო ინტერვენციას სხვადასხვა ქვეყნებში. ხმა უნდა ამოიღონ.

ევროპაში დროსტარებას რომ ვერ შეძლებენ და თავის ვორონეჟში და სარატოვში ჩაიკეტებიან, შემდეგ მიხვდებიან რა არის სიკეთე და რა არის ბოროტება“, – წერს დიმიტრი შაშკინი.