ხვალ, 10:30 საათზე, საქართველოს მთავარი პროკურატურის წინ "აფხაზთა კრების" ლიდერი მალხაზ პატარაია და ანტიოკუპაციური მოძრაობა "ძალა ერთობაშიას" ლიდერი დავით ქაცარავა ერთობლივ ბრიფინგს გამართავენ.
"აფხაზთა კრება", მასში შემავალი ორგანიზაციებით, ასევე ანტისაოკუპაციო მოძრაობა "ძალა ერთობაშია" (დავით ქაცარავა) პროკურატურაში შეიტანენ განცხადებას პარლამენტის წევრის, პრეზიდენტობის კანდიდატ სალომე ზურაბიშვილის მიმართ გამოძიების დაწყების მოთხოვნით, სისხლის სამართლის კოდექსის კონკრეტული მუხლების საფუძველზე.
"საქართველოს სისხლის სამართლის კოდექსის თანახმად:
მუხლი 308. საქართველოს ტერიტორიული ხელშეუხებლობის დარღვევა
1. საქართველოს საწინააღმდეგო მოქმედება, მიმართული უცხო ქვეყნისათვის საქართველოს მთელი ტერიტორიის ან მისი ნაწილის გადაცემისაკენ ანდა საქართველოს ტერიტორიიდან მისი ნაწილის გამოყოფისაკენ,-
ისჯება თავისუფლების აღკვეთით ვადით ათიდან თხუთმეტ წლამდე.
მუხლი 319. უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარება.
უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისათვის დახმარება ისეთ საქმიანობაში, რომლის მიზანია საქართველოს სახელმწიფოებრივი ინტერესის ხელყოფა . . .,-
ისჯება თავისუფლების აღკვეთით ვადით შვიდიდან თხუთმეტ წლამდე.
ყოველივე ზემოთქმულიდან გამომდინარე, გთხოვთ:
შეისწავლოთ საქართველოს პარლამენტის წევრის, პრეზიდენტობის კანდიდატის სალომე ზურაბიშვილის მიერ საქართველოს ტერიტორიული მთლიანობის, სახელმწიფო ინტერესების წინააღმდეგ მიმართული ზემოთმოყვანილი, მათთან დაკავშირებული სხვა ფაქტები და მისცეთ მათ შეფასება სისხლის სამართლის კოდექსის 308-ე და 319-ე მუხლების საფუძველზე", - ნათქვამია ერთობლივ განცხადებაში.