შინაგან საქმეთა სამინისტროს პრესსამსახურის თანამშრომელი ტატო კუჭავა "ფეისბუქში" 112-შის მიერ გადარჩენილ ადამიანებზე წერს: "ამბავი, რომელიც აუცილებლად უნდა წაიკითხოთ", - ასე დაასათაურა მან სტატუსი.
112-ში 11 წლის გოგონა რეკავს.
-1-1-2 გისმენთ, 1-1-2 გისმენთ...
- სასწრაფოს გამოძახება მინდა, -10-12 წლის გოგონამ აღელვებული ხმით უპასუხა ოპერატორს.
- რომელი ქალაქიდან გვიკავშირდებით?
(ხმა აღარ ისმის)
- მისამართი მითხარით, რომელი ქალაქიდან რეკავთ?
- თბილისიდან... - ისევ გამოვიდა კონტაქტზე გოგონა.
-რა გქვია?
- ნინო...
- ნინო, ზუსტი მისამართი უნდა მითხრა, დროულად რომ აღმოგიჩინოთ დახმარება...
- დედა, შემომხედე!.. - გოგონა ტიროდა. პერიოდულად აღარ უსმენდა ოპერატორს. დაბნეულობას ემატებოდა ცუდი სმენადობა.
ოპერატორმა შეძლო მისამართის გაგება, მაგრამ შესაძლებელი იყო, გოგონას ის არასწორად ეთქვა, ნერვიულობის გამო, ამიტომაც, ოპერატორი მისამართის სასწრაფოდ დაზუსტებამდე დეტალების გარკვევას შეეცადა:
- ნინო, დამეხმარე, რომ დაგეხმარო... გთხოვ დამშვიდდი და მითხარი, რა ხდება? სასწრაფო გამოსულია და მალე მოვა. დედა ცუდადაა?
- დედიკო, ბებო და ბიძაშვილი. ვეღარ ლაპარაკობენ, არ ვიცი რა ჭირთ... - ისმის პატარა ბავშვის ტირილიც...
- უგონოდ არიან?
- არა, გონზე არიან მაგრამ ვეღარ ლაპარაკობენ... არ ვიცი რა დაემართათ... -ოპერატორი მაშინვე მიხვდა, რომ შესაძლოა, ბუნებრივი აირის გაჟონვასთან ჰქონოდა საქმე და გოგონასთვის რჩევების მიცემაზე გადავიდა:
- ნინო, ხომ არ იცი გაზის მილს სად აქვს ჩამკეტი?
- კი, ვიცი...
- გადაკეტე სასწრაფოდ და ყველა ფანჯარა გამოაღე, ტელეფონი არ გამითიშო...
- ეხლავე... - ნინო ტიროდა, თუმცა ძალიან კარგად ასრულებდა ოპერატორის მითითებებს.
- შენ როგორ გრძნობ თავს?
- მეც ცუდად ვარ, ფეხები მეკეცება...
- ტელეფონი არ გამითიშო, სადარბაზოში გადი და შეეცადე მეზობელი დამალაპარაკო... შემოსასვლელი კარი ღია დატოვე და მერე ფანჯარასთან დადექი და ღრმად ისუნთქე სუფთა ჰაერი... - ოპერატორი ცდილობდა, მისამართი დაეზუსტებინა.
საბედნიეროდ, მეზობელი სახლში აღმოჩნდა და ოპერატორმა შესძლო მისამართის დაზუსტება.
- გთხოვთ, ყურადღებით იყოთ ტელეფონთან, სასწრაფოს ბრიგადა დაგიკავშირდებათ, გზაშია, 5-7 წუთში ადგილზე იქნება, - უთხრა ოპერატორმა მეზობელს.
- აუცილებლად, - უპასუხა მეზობელმა.
რამდენიმე წუთში სასწრაფოსთან ერთად ადგილზე მივიდა გადაუდებელი დახმარების ბრიგადები/ეკიპაჟი. ოთხივე მოქალაქეს ადგილზე გაეწია შესაბამისი დახმარება და დღეს ნინო ძალიან კარგად გრძნობს თავს - დედიკოსთან, ბებიასთან და 7 წლის ბიძაშვილთან ერთად.