2014-02-20 18:10

ფოტოებთან დაკავშირებით, სადაც პრეზიდენტის ავლაბრის რეზიდენციის ეზოში სკეიტბორდებით მოსეირნე და დარბაზში, ტრიბუნასთან მდგარი პირები არიან გამოსახული, „აფხაზეთის ხმა“ კომენტარისთვის პრეზიდენტის ადმინისტრაციის ყოფილ ხელმძღვანელს ირმა ნადირაშვილს დაუკავშირდა.

საპარლამენტო უმცირესობის წევრი და „ერთიანი ნაციონალური მოძრაობის“ ერთ–ერთი ლიდერი მიიჩნევს, რომ მსგავსი ქცევა პრეზიდენტის რეზიდენციაში მიუღებელია:

„მე ვნახე ეს ფოტოები. არ ვიცი, ვინ არიან ეს ადამიანები, მაგრამ ვიცი, რომ ამ შენობას ამ ჯერ კიდევ პრეზიდენტის ადმინისტრაცია ჰქვია. ეს შენობა არის სახელმწიფოს ერთ–ერთი სიმბოლო და არა გასართობი ცენტრი.

ამ გუმბათიან დარბაზში იქმნებოდა ქვეყნის უახლესი ისტორიის მნიშვნელოვანი ნაწილი. შესაძლოა, გიორგი მარგვრლაშვილი პიროვნულად პატივს არ სცემდეს მიხეილ სააკაშვილს, მაგრამ ის ვალდებულია, პატივი სცეს პრეზიდენტის ინსტირუტს.

მეც არ მომწონს გიორგი მარგველაშვილი, მაგრამ ამის მიუხედავად, ვაპირებ ხვალ, როცა ის პარლამენტის დარბაზში შემოვა, ფეხზე წამოდგომით დავადსტურო ჩემი პატივისცემა ხალხის მიერ არჩეული პრეზიდენტის მიმართ“, – განაცხადა ირმა ნადირაშვილმა „აფხაზეთის ხმასთან“ კომენტარში.

შეგახსენებთ, რომ ფოტოები „აფხაზეთის ხმის“ ვებ–გვერდზე გამოქვეყნდა და დიდი გამოხმაურება მოჰყვა სოციალურ ქსელებში. როგორც გაირკვა, პრეზიდენტის ტრიბუნასთან მდგარ ერთერთ პირს ხელში სათამაშო რევოლვერი უჭირავს – ეს მან გამოქვეყნებულ სტატიაზე დაწერილ კომენტარში თავად აღნიშნა.