ქვეყნისთვის აუცილებელი და მნიშვნელოვანია რელიგიური ტურიზმის ხელშეწყობა. სამწუხაროდ, ტურისტებსა და საქართველოს მოქალაქეებს არ ეძლევათ საშუალება სრულყოფილად მოილოცონ ასურელ წმინდა მამათა სავანეები.
რამდენიმე ღირსი მამის მოღვაწეობის ადგილი საქვეყნოდ ცნობილია. ხშირია სასკოლო ტურები.
მეტნაკლებად მოვლილი და დაფასებულია ასურელი მამების სამოღვაწეო ადგილი და რატომღაც გამონაკლისია ერთ-ერთი ღირსი მამის თადეოზ სტეფანწმინდელის მოღვაწეობისა და სავარაუდო დაკრძალვის ადგილიც.
მომლოცველთა ჯგუფი, რომელიც თადეოზ სტეფანწმინდელის მოღვაწეობისა და დაკრძალვის ადგილის მოსალოცად წავიდა, „აფხაზეთის ხმას“ სწერს:
„აღვუთქვით რა უფალს ასურელ მამთა ნამოღვაწართა მოლოცვა. ინტერნეტ მეგზურებისა რუკების გამოყენებამაც არ მოგვცა შედეგი. რომ არა კასპში მოღვაწე მამა იოანეს გულისხმიერება, რომელმაც ჩვენი გაცილება ითავა, ალბათ ვერ გავიკვლევდით გზას.
გზას, რომელიც წყალს რამდენიმე ადგილზე წაღებული აქვს და ნახევრად გაბალახებული ბილიკებია. ტაძრის შემჩნევაც მთებში მხოლოდ ერთი ადგილიდანაა შესაძლებელი.
გარემო საოცრად წააგავს შიო-მღვიმის სამონასტრო კომპლექსს. ფერდობებზე ახლაც შეიმჩნევა ბერების მღვიმე-კელიები -- მოწმენი წარსულში სულიერი ღვაწლისა. დღეისთვის ეკლესიის სახურავი მთლიანად ჩამოქცეულია, კედლებიც ნახევრად დანგრეული და დაბზარულია.
ვნახეთ მიწაში ამოღებული ნახევრად გაწმენდილი მღვიმე, სადაც ღირსი მამა თადეოზ სტეფანწმინდელი მოღვაწეობდა. სავარაუდოდ ის იქვეა დაკრძალული“.
მომლოცველთა ჯგუფმა „აფხაზეთის ხმას“ ფოტოებიც გამოუგზავნა, რომლებსაც აქვე ვაქვეყნებთ.