2017-10-13 21:24

ნაციონალური მოძრაობის მაჟორიტარობის კანდიდატმა ლევან ხაბეიშვილმა ცესკოში არსებული სავარაუდო ნეპოტიზმის ახალი ფაქტები წარმოადგინა.

მისი თქმით, ცესკოში თავმჯდომარის ნათესავები არიან დასაქმებული. ხაბეიშვილი ამის მაგალითად მოჰყავს ის ფაქტი, რომ თამარ ჟვანიას ცესკოში საკუთარი შვილი ჰყავდა დასაქმებული.

„სხვა რაიონებშიც ოლქის წარმომადგენლები, ოლქის თავმჯდომარეები, იმისთვის, რომ დამატებითი შემოსავალი მიიღონ, ასევე, გაფორმებული არიან ცესკოს სიებში და ესეც ამ დოკუმენტებით დასტურდება. ასევე, მნიშვნელოვანია, ქალბატონ თამარ ჟვანიას შევახსენოთ, რომ მისი საკუთარი შვილი ჰყავდა მისსავე დაწესებულებაში ანუ ცესკოში დასაქმებული და შესაბამისად, რაიმე დისკრედიტაციაზე საუბარი ცოტა არ იყოს უხერხულია,“ - განაცხადა ლევან ხაბეიშვილმა.

ხაბეიშვილმა ამის დასადასტურებლად მარტვილის მაგალითი მოიყვანა, სადაც მისი თქმით, მმართველი გუნდის სახის, ირინა გადელიას რძალი საოლქო კომისიაში არის მუდმივმოქმედი წარმომადგენელი.
„შესაბამისად, საზოგადოებამ თავად განსაჯოს, როგორ ატარებს ცესკო არჩევნებს, რამდენად ნეიტრალურია, რამდენად მიუკერძოებელია,“ - განაცხადა ლევან ხაბეიშვილმა.