კონგოში ტყვედ ჩავარდნილი ქართველი მფრინავის სოსო ოსორაულის მეგობრებზე დაყრდნობით "ამბები.ჯი" წერს, რომ ოსორაული ცოცხალია და მას ამბოხებულებმა მეორედ შეუცვალეს ადგილსამყოფელი.
ქართველი მფრინავის ინკოგნიტო მეგობრები ამბობენ, რომ პოლკოვნიკის გაცვლას კონგოს ხელისუფლების მიერ დატყვევებულ გენერალ ბოსკონ ტაგანდაში ითხოვენ.
შეგახსენებთ, რომ ტვ "იმედიმა" გაავრცელა ინტერვიუ კონგოელ ამბოხებულთა მეთაურთან, სადაც ის ამბობს, რომ ქართველი მფრინავი 13 ან 14 მაისს, მაშინ დაიღუპა, როცა კონგოს სახელისუფლო ძალებმა იერიში განახორციელეს.
ამბოხებულთა ლიდერის თქმით, მათ გამოსასყიდი არ მოუთხოვიათ, რადგან ტერორისტები არ არიან, ხოლო შეთანხმება ქართულ მხარესთან ოსორაულის გადაცემაზე უკვე არსებობდა და ის სწორედ იმ დროს უნდა მომხდარიყო, როცა იერიში დაიწყო. ამბოხებულთა ლიდერის თქმით, იმ შეტაკებაში 6 მებრძოლი დაკარგეს.
სოსო ოსორაულის მეგობარი, თადარიგის ოფიცერი და სამხედრო ბლოგერი დავით ნემსაძე "იმედის" სიუჟეტს ოპერატიულად გამოეხმაურა და "სრული პასუხისმგებლობით" განაცხადა, რომ სოსო ოსორაული ცოცხალია, ხოლო სიტუაციის გართულების შემთხვევაში ტვ "იმედის" პასუხისმგებლობაზე მიანიშნა.
ქართველი მფრინავის შესაძლო დაღუპვის ფაქტს საქართველოს მესამე პრეზიდენტი მიხეილ სააკაშვილიც გამოეხმაურა, რომელმაც 2012 წელს ქართული უწყებათაშორისი კომისიის მიერ სომალელი მეკობრეების ტყვეობისგან 6 ქართველი მეზღვაურის დახსნის ფაქტი გაიხსენა და განაცხადა, რომ თუ სოსო ოსორაულის დაღუპვა მართლაც დადასტურდება, პასუხისმგებლობა ბიძინა ივანიშვილის უნდა დაეკისროს.
