საკონსტიტუციო პროექტის პრეზიდენტის სასახლეში განხილვის ინიციატივით გამოდის პრეზიდენტის ადმინისტრაცია. ამის შესახებ პრეზიდენტის ადმინისტრაციის უფროსმა, გიორგი აბაშიშვილმა ჟურნალისტებს განუცხადა.
"იმისათვის, რომ რეალურად არ დავდგეთ ნულოვანი კონსენსუსის წინაშე ამ პროცესში, რომლის შესახებაც ჩვენ ვსაუბრობდით მუდმივად და რომელზეც ახლა უკვე ვენეციის კომისია მიგვითითებს, საჭიროა გარკვეული რეალური ქმედითი ნაბიჯების გადადგმა.
ჩვენ ყოველთვის მხარს ვუჭერდით ფართო ჩართულობას, პროცესის მაღალ ლეგიტიმაციას და შესაბამისად, მივესალმებით საქართველოს პარლამენტის თავმჯდომარის განცხადებას, ერთობლივ მსჯელობასთან დაკავშირებით და ვთავაზობთ, რომ აქ, პრეზიდენტის სასახლეში გაიმართოს შეხვედრა, რომელშიც მონაწილეობას მიიღებენ საქართველოს პრეზიდენტი, პარლამენტის თავმჯდომარე, პრემიერი, სახალხო დამცველი, პოლიტიკური პარტიები, არასამთავრობო ორგანიზაციები, ექსპერტები და ბიზნეს ასოციაციები, რომელი პროცესიც ფართოდ იქნება გაშუქებული მედიის მიერ იმ პრობლემურ საკითხებზე, რომელიც დღეს ჩვენ ხელს გვიშლის მივაღწიოთ რეალურ კონსენსუსს.
ეს მსჯელობა საჭიროა იმისთვის, რომ ეს უმნიშვნელოვანესი სახელმწიფოებრივი დოკუმენტი მივიღოთ არა ერთპარტიულად, არამედ ფართო კონსენსუსის საშუალებით",- განაცხადა აბაშიშვილმა.
