2017-06-02 15:46

კიევში ატო-ს ზონის (ანტიტერორისტული ოპერაციის ზონა) ბატალიონ "კიევი-2"-ის მეთაურს ადამ ოსმაევსა და მის ცოლს - ამინა ოკუევას ესროლეს. ადამ ოსმაევი, რომელიც უკრაინაში ჩეჩნური ბატალიონის მეთაური იყო, დაჭრილია, დაჭრილია ასევე ქილერიც, რომელიც მებრძოლებთან ნდობაში შევიდა, როგორც ჟურნალისტი და ვითომდა ინტერვიუს ჩაწერისთვის მზადების დროს, მოულოდნელად გაუხსნა ცეცხლი.

მას შემდეგ, რაც ქილერმა ადამ ოსმაევს ესროლა, იქვე მყოფმა ოსმაევის ცოლმა თავდაცვის მიზნით საპასუხო ცეცხლი გახსნა და ქილერი დაჭრა. ამ დროისთვის ადგილზე პოლიცია მუშაობს, ოსმაევი და ქილერი კლინიკაში მძიმე ჭრილობებით გადაიყვანეს.

ცნობილი გახდა, რომ ქილერი ცოლ-ქმარს წარუდგა, როგორც ალექს ვერნერი, Le Monde-ს ფრანგი ჟურნალისტი. მან ოსმაევს "გლოკიდან" ესროლა, საპასუხოდ კი მისი ცოლისგან - ამინა ოკუევასგან, რომელიც ასევე მოხალისედ იბრძვის უკრაინის ერთიანობისთვის, "მაკაროვის" ოთხი ტყვია მიიღო.
აღსანიშნავია, რომ ოსმაევი 2012 წელს ოდესაში დააკავეს და ბრალად კორპუსის აფეთქებისთვის მზადება წაუყენეს. ოსმაევს რუსეთის მხრიდან ბრალად ედებოდა ასევე რუსეთის პრეზიდენტ ვალდიმირ პუტინზე თავდასხმის მომზადება და მასზე ძებნა იყო გამოცხადებული. ეთნიკურად ჩეჩენი ოსმაევი რუსეთის მოქალაქეა.

რუსეთმა მისი ექსტარდირება მოითხოვა, თუმცა, ევროსასამართლოს რეკომენდაციით, უკრაინამ ექსტრადიციის განხილვა შეაჩერა, ხოლო ოსმაევი, მას შემდეგ, რაც 2,5 წელზე მეტი სასჯელი უკრაინაში მოიხადა, 2014 წლის ნოემბერში პატიმრობიდან გათავისუფლდა.
2015 წლის თებერვალში, ისი მუნაევის დაღუპვის შემდეგ ადამ ოსმაევი ჩეჩნური ბატალიონის მეთაური გახდა.