2017-06-01 16:31

ალბათობა იმისა, რომ საზღვრის რომელიმე წერტილი შეიძლება ადამიანმა მესაზღვრის გვერდის ავლით გადაკვეთოს, დაბალია, მაგრამ არსებობს - ეს განცხადება, საქართველოს შინაგან საქმეთა მინისტრმა გააკეთა. გიორგი მღებრიშვილი აზერბაიჯანელი ჟურნალისტის იძულებით გაყვანის საქმეს საგანგებო ბრიფინგით გამოეხმაურა.

გიორგი მღებრიშვილი მოუწოდებს საზოგადოებას, წინასწარი დასკვნების გაკეთებისგან თავი შეიკავონ და დაელოდონ გამოძიებას.

შს მინისტრის განცხადებით, გამოძიების ფარგლებში შედგა კომუნიკაცია აზერბაიჯანულ მხარესთან. შესაბამისი უწყებებისგან მიღებულ იქნა ოფიციალური ინფორმაცია, რომ მუხთარლი დაკავებული იქნა აზერბაიჯანის სასაზღვრო სამსახურის მიერ ბალაკენსკის რაიონის მიმართულებით, საქართველოს მხრიდან სახელმწიფო საზღვრის უკანონო გადაკვეთისა და დიდი ოდენობით არადეკლარირებული უცხოური ვალუტის საქართველოდან აზერბაიჯანში, კონტრაბანდის სახით გადატანის გამო.

"საქართველოს სასაზღვრო პოლიცია, სახელმწიფო საზღვრის კონტროლს თანამედროვე სტანდარტების შესაბამისად ახორციელებს. აღნიშნული სტანდარტი გულისხმობს, გამშვები პუნქტების გარდა ტერიტორიების, ე.წ. მწვანე ზოლის სასაზღვრო პოლიციის მორიგე ჯგუფების მიერ კონტროლს. ალბათობა იმისა, რომ საზღვრის რომელიმე წერტილი შეიძლება ადამიანმა მესაზღვრის გვერდის ავლით გადაკვეთოს, დაბალია, მაგრამ არსებობს. აზერბაიჯანული კოლეგების განცხადებით, მუხთარლის შემთხვევაში სწორედ მსგავს ფაქტთან გვაქვს საქმე," - აცხადებს გიორგი მღებრიშვილი.  

შს მინისტრის ინფორმაციით, მომხდარზე გამოძიება 143-ე მუხლით მიმდინარეობს, რაც თავისუფლების უკანონო აღკვეთას გულისხმობს.