2017-05-10 20:20

თავდაცვის ყოფილი მინისტრი, თინა ხიდაშელი, თავდაცვის სფეროში საკონსტიტუციო ცვლილებებს აკრიტიკებს და აცხადებს, რომ ახალ კონსტიტუციაში ისეთი დებულებები იდება, რომელიც ერთმანეთს გამორიცხავს.

ხიდაშელი ამბობს, რომ ამ კონსტიტუციური ცვლილებებით და ცუდი მმართველობის პირობებში, შესაძლოა, ახალი მხედრიონი მივიღოთ.

"არ შეიძლება, კონსტიტუცია რომელიმე ადამიანზე მორგებით ან მის წინააღმდეგ იწერებოდეს. ჩვენ ვერ ვიქნებით იმის იმედად, რომ ხელისუფლებაში კეთილი ნების ადამიანები მოდიან და სულ კარგი და კეთილი სურვილები აქვთ. არ შეიძლება კონსტიტუციაში იყოს დებულებები, რომელიც ერთმანეთს გამორიცხავს ან ფართო ინტერპრეტაციის საშუალებას იძლევა.

როდესაც კონსტიტუციაში წერ, რომ შენ ხარ სამხედრო ძალები და სხვა შეიარაღებული ძალები და არც ერთ სიტყვას არ ამბობ, თუ რას ნიშნავს სხვა ძალები, ცუდი მმართველის პირობებში ახალი "მხედრიონის" არსებობის შანსს აჩენ",- განაცხადა თინა ხიდაშელმა პრეზიდენტის სასახლეში საკონსტიტუციო ცვლილებებისა და უსაფრთხოების საკითხებზე გამართულ კონფერენციაზე.