მე სასამართლო სისტემაში რომც არ ვიყო, არ დავიკარგები - ამ განცხადებით, ლევან მურუსიძე არასამთავრობო ორგანიზაციების მიერ გამოთქმულ კრიტიკას გამოეხმაურა, რომელიც უზენაესი სასამართლოს ყოფილი მოსამართლეების შესაძლო უვადო დანიშვნას ეხება.
საკითხი მას შემდეგ გააქტიურდა, რაც ძალაში შევიდა ახალი კანონი, რომლის მიხედვითაც, უზენაესი სასამართლოს ყოფილი მოსამართლეები ხელმეორედ უვადოდ, გამოსაცდელი ვადის გარეშე დაინიშნებიან. თავად მურუსიძე აცხადებს, რომ საქმე არა მხოლოდ მას, არამედ უზენაესი სასამართლოს ყოფილ მოსამართლეებს ეხება.
„მიღებულ იქნა კანონი რომლის თანახმადაც მოსამართლე, რომელიც იყო უზენაესი სასამართლოს წევრი და აქვს მინიმუმ სამ წლიანი გამოცდილება, არ უნდა დაექვემდებაროს გამოსაცდელ ვადას. კანონში ხომ არ ჩაიწერება, რომ ყველას გარდა მურუსიძისა, ამიტომ აქედან გამომდინარე საბჭო იმსჯელებს.
მე სასამართლო სისტემაში რომც არ ვიყო, არ დავიკარგები და მერწმუნეთ არ ვარ ცუდი იურისტი.
ეს რომ ყოფილიყო ლევან მურუსიძის გამო გაკეთებული, ეს გაკეთდებოდა იმ დროს როდესაც იქნა მიღებული კანონი. ორი თვის უკან, სამი თვის უკან და მერწმუნეთ ამაში ვერც არასამთავრობოები და ვერავინ ხელს ვერ შემიშლიდა. აქედან გამომდინარე არ არის საჭირო დრამატიზება,“-განაცხადა ლევან მურუსიძემ.
