
ძლიერმა ქარმა, საქართველოს მასშტაბით რამდენიმე რეგიონში პრობლემა შექმნა. განსაკუთრებით დაზარალდა აჭარა, გურია და სამეგრელო.
ხელვაჩაურის რაიონში, სოფელ ჭარნალში ძლიერმა ქარმა საცხოვრებელი სახლი დაანგრია. შაინიძეების ოჯახმა სახლის დატოვება მოასწრეს. დაზარალებულების განცხადებით, განადგურებულია საყოფაცხოვრებო ნივთები და ტექნიკა. მათ დროებით მეზობლებს შეაფარეს თავი. ოჯახი დახმარებას ხელისუფლებას სთხოვს. ქარბორბალამ სოფელში კიდევ რამდენიმე სახლი დააზიანა.
ზუგდიდის რაიონის 46 სოფლიდან, 28 სოფელს ელექტროენერგია არ მიეწოდება. ინფორმაციას საზოგადოებრივი მაუწყებელი ავრცელებს. რამდენიმე სოფელში ავტოსაგზაო მოძრაობა შეფერხებულია, რადგან ძლიერმა ქარმა ხეები მოგლიჯა. დაზიანებულია ზუგდიდი-ანაკლიას გზაზე გარე განათება.
ამასთან, 15-მდე ხეა მოგლეჯილი ზუგდიდის რაიონული საავადმყოფოს ყოფილ შენობასთან, სადაც ამჟამად აფხაზეთიდან დევნილები ცხოვრობენ. როგორც დევნილები აცხადებენ, ხის დაცემის შედეგად აფეთქდა ტრანსფორმატორი. როგორც ზუგდიდს რაიონის გამგებელმა ლაშა გოგიამ განაცხადა, ყველა შესაბამისი სამსახური საქმის კურსშია ჩაყენებული. მისივე თქმით, მიმდინარეობს სალიკვიდაციო სამუშაოები.