2017-04-24 10:09

11 მარტის ბათუმის მოვლენების ორგანიზების ბრალდებით, ირაკლი ჩხვირკია და მერაბ ღოღობერიძე დააკავეს. ინფორმაციას "საზოგადოებრივი მაუწყებელი" ავრცელებს. 

 შინაგან საქმეთა სამინისტროს ინფორმაციით, ბათუმის საქალაქო სასამართლოს განჩინების საფუძველზე, აჭარის პოლიციის დეპარტამენტის დეტექტივების სამმართველოს თანამშრომლებმა, ჯგუფური დანაშაულის ორგანიზებისა და ხელმძღვანელობის ბრალდებით, ორი პირი - 1985 წელს დაბადებული მ.ღ. და 1987 წელს დაბადებული ი.ჩ. დააკავეს. 

შსს-ს ცნობით, ისინი დაკავებულნი არიან სსკ-ის 225-ე მუხლის პირველი ნაწილით, რაც ჯგუფური მოქმედების ორგანიზებას ან ხელმძღვანელობას, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ანდა მათზე თავდასხმას გულისხმობს. 

შსს-ს განცხადებით, ირაკლი ჩხვირკია თბილისში, მერაბ ღოღობერიძე  კი ბათუმში დააკავეს.