2016-01-22 20:27

"ქართულიგაზეთი" წერს, რომ შეწყალების და ვადაზე ადრე გათავისუფლების საკითხებთან დაკავშირებით,  პოლიტიკოსების მიერ ერთმანეთის ბრალდებების ფონზე, დღის სინათლეზე სულ უფრო დამაფიქრებელი, უცნაური და საეჭვო ფაქტები გამოდის. 

ასეთ ფაქტად "ქართული გაზეთი" ვუგარ ალიევის საქმეს ასახელებს, რომელიც 2013 წლის 25 დეკემბერს შეიწყალეს. ამ პერიოდში კომისიას ალეკო ელისაშვილი ხელმძღვანელობდა.

ითვალისწინებს რა საზოგადოების ინტერესს ამ საკითხისადმი, "აფხაზეთისხმა" გთავაზობთ "ქართული გაზეთის" მიერ გამოქვეყნებულ მასალას:

"ვუგარ ბაქირ-ოღლი ალიევს, დაბადებულს 1973 წლის 26 ივლისს, თბილისის და ბოლნისის რაიონული, საქალაქო და სააპელაციო სასამართლოების მიერ 2010 წელს მისჯილი ჰქონდა 27 წელი. სასჯელი შეფარდებული იყო დიდი ოდენობით სხვისი საკუთრების თაღლითობით მისაკუთრების, ამ მუხლით დანაშაულის ორჯერ ან მეტჯერ ჩადენის, ნარკოტიკების უკანონო შენახვა-შეძენის და გასაღების მუხლებით.

ვუგარ ალიევის შემთხვევაში საგულისხმოა, რომ ის სასჯელს იხდიდა ყოფილი პრემიერ მინისტრის სიმამრთან თამაზ თამაზაშვილთან ერთად. შესაბამისად ჩნდება კითხვა: შუამდგომლობდა თუ არა თამაზ თამაზაშვილი ვუგარ ალიევის შეწყალებას იმდროინდელი კომისიის თავმჯდომარე ალეკო ელისაშვილთან ან უშუალოდ პრეზიდენტ მარგველაშვილთან.

კითხვები ჩნდება, თუ რა პრინციპით იხელმძღვანელა შეწყალების კომისიამ თუ პრეზიდენტმა მარგველაშვილმა ასეთი მძიმე დანაშაულებებისთვის გასამართლებული პირის შეწყალებისას.

ალეკო ელისაშვილს სამი კითხვით მივმართეთ: 

1. ალიევის შეწყალების რეკომენდაცია კომისიამ გასწია თუ პრეზიდენტმა პირადად მიიღო გადაწყვეტილება?

2. რა პრინციპით მოხდა ასეთი მძიმე დანაშაულებებზე გასამართლებული პირის შეწყალება?

3. ჰქონდა თუ არა ადგილი თამაზაშვილის შუამდგომლობას ან ზეწოლას კომისიაზე ვუგარ ალიევის შეწყალებასთან დაკავშირებით?

ალეკო ელისაშვილი: „კომისიას ეს საქმე არ განუხილავს. დანარჩენი პრეზიდენტის ადმინისტრაციას კითხეთ.“

თავად ვუგარ ალიევმა ჩვენთან საუბარში განაცხადა: „ შემიწყალეს 2013 წლის დეკემბერში. დიახ, ერთ „კამერაში“ ვიჯექი თამაზ თამაზაშვილთან ერთად, მაგრამ ის არაფერ შუაშია. 27 წელი მქონდა და 2013 წლის სექტემბერში პარლამენტის ამნისტიამ გამინახევრა. მერე დეკემბერში შემიწყალეს. ვანო მერაბიშვილის და ირაკლი კოდუას უკანონო პატიმარი ვიყავი.“

არავითარი საფუძველი ასეთი დანაშაულებისგან პატიმრის გასათავისუფლებლად არ არსებობს. სამაგიეროდ, არსებობს რამდენიმე წყაროს მიერ მოწოდებული ინფორმაცია, რომ ვუგარ ალიევის გათავისუფლებას ხელი შეუწყო მასთან ერთად ერთ საკანში მჯდომმა თამაზ თამაზაშვილმა, რომელიც ამ დროისთვის უკვე გათავისუფლებული იყო".

"ქართული გაზეთი" აქვეყნებს ასევე პრეზიდენტ გიორგი მარგველაშვილის დადგენილებას ვუგარ ალიევის შეწყალებასთან დაკავშირებით: