2015-10-16 23:28

რუსეთის საგარეო საქმეთა სამინისტრო ჰააგის სასამართლოს პროკურორის გადაწყვეტილებას ეხმაურება, რომლის მიხედვითაც, ფატუ ბენსუდა 2008 წლის რუსეთ-საქართველოს ომის გამოძების დაწყებას ითხოვს.

რუსეთის საგარეო უწყების მიერ გავრცელებულ განცხადებაში ნათქვამია, რომ 2008 წლის მოვლენების შეფასება ფაქტობრივად ამართლებს მიხეილ სააკაშვილის ქმედებებს.

რუსეთის საგარეო უწყების ინფორმაციით 2008 წლის შემდეგ, ჰააგის სასამართლოს ასობით განცხადებით მიმართეს ომის დროს დაღუპულთა ოჯახის წევრებმა, სადაც მოყვანილი იყო საქართველოს მაშინდელი პრეზიდენტის, მიხეილ სააკაშვილის რეჟიმის დანაშაულებრივი ქმედებები. თუმცა, სერგეი ლავროვის უწყებას მიაჩნია, რომ ჰააგის სასამართლოს პროკურორის დასკვნები განსხვავდება რუსეთის საგამოძიებო ორგანოების მიერ დადებული დასკვნებისგან.

„საერთაშორისო სისხლის სამართლის პროკურორის დასკვნის საფუძველზე შეგვიძლია ვივარაუდოთ, რომ საერთაშორისო გამოძიების საგანი არ გახდება სამხრეთ ოსეთის მოსახლეობის მიზანმიმართული მკვლელობები. პროკურატურას ასევე ეჭვი შეაქვს რუს სამშვიდობოებზე თავდასხმის ფაქტზე. სამაგიეროდ, სასამართლოს გამომძიებლები აცხადებენ, რომ ისინი მზად არიან გამოიძიონ ეთნიკური ქართველების წინააღმდეგ ჩადენილი სეპარატისტების და რუსეთის შეიარაღებული ძალების ქმედებები, რომლებიც, როგორც პროკურატურა მიიჩნევს, შესაძლოა სეპარატისტების ქმედებების თანამონაწილეები იყვნენ.

ნაკლებად სავარაუდოა, რომ 2008 წლის მოვლენების შეფასების, რეალობიდან მოწყვეტილი ასეთი ინტერპრეტაცია, რომელიც შინაარსობრივად ესარჩლება სააკაშვილის რეჟიმს, ნდობას შემატებს პროკურორს. ვიმედოვნებთ, რომ პროკურორის შუამდგომლობის განხილვის შემდეგ, მოსამართლეები ისეთ გადაწყვეტილებას მიიღებენ, რომელიც სამართლის პრინციპებს პასუხობს“, - ნათქვამია რუსეთის საგარეო საქმეთა სამინისტროს განცხადებაში.

"პირველი"