-
2015-05-04 23:22
საქართველოს პრეზიდენტის ადმინისტრაციის ყოფილი უფროსი ანდრო ბარნოვი „ფეისბუქის“ მეშვეობით მიმართავს ქართველ პოლიციელებს და მოუწოდებს, მხარი დაუჭირონ ქართველ პატრიოტებს, რომლებიც რუს ბაიკერებს „გეორგიევსკის ლენტების“ ჩამოხსნისკენ მოუწოდებენ.
„პოლიციელებო, ძვირფასებო, გთხოვთ, წაიკითხეთ ეს მიმართვა და დაფიქრდით. გეხებათ მხოლოდ იმათ, ვისაც ეს სიტყვები გეუცხოებათ...
დღეს ვნახე კადრები, როგორ უშლიან ხელს და აკავებენ პოლიციელები ახალგაზრდებს, რომ ე.წ. გეორგიევსკი ლენტები და რუსეთის დროშები მოხსნან "ბაიკერების" მოტოციკლეტებიდან.
მოვისმინე პოლიციელთა არგუმენტები, რომ ეს თურმე სხვისი ქონების დაზიანება ყოფილა. ძალიან ვწუხვარ ამ ყველაფრის გამო და, მინდა, შემდეგზე დაფიქრდეთ:
საზოგადოებაში მრავალი ისეთი ჯგუფი გამოჩნდა, რომელიც აქტიურად ეწინააღმდეგება ოკუპანტის სიმბოლიკით პარპაშს. რუსეთის ელჩის მანქანას რომ ერჩოდნენ (ასეთი არ არსებობს), მაშინ გასაგები იქნებოდა თქვენი რეაქცია, მაგრამ ეს ადამიანები ეწინააღმდეგებიან დაცინვას და ეროვნული ღირსების შეურაცხყოფას განსაკუთრებით იმ ადამიანების მხრიდან, რომლებიც სწორედ ამ მიზნით შემოვიდნენ ქვეყანაში. გეორგიევსკის ლენტი არ არის უბრალოდ "ქონება". ის არის სიმბოლო, რომლითაც ჩვენ შეურაცხყოფას გვაყენებენ და რასაც თქვენ თქვენი ქმედებებით მხარს უჭერთ.
ამ "ქონების" პატრონებს მშვიდად შეუძლიათ, ეს ლენტი ჯიბეში შეინახონ. მაგრამ ცალსახად კარგია, როდესაც საზოგადოება ამ სიმბოლოს საჯაროდ ფრიალს ეწინააღმდეგება და ამით ერთიანობისა და ღირსების დემონსტრირებას ახდენს.
თქვენ ამ ტენდენციას მხარი უნდა დაუჭიროთ, ხელი კი არ უნდა შეუშალოთ. ერთად დადექით და ვერც სამსახურიდან დაგითხოვთ ვინმე და არც საზოგადოების ზიზღსა და უნდობლობას დაიმსახურებთ.
ტვინი და გული გაანძრიეთ, ბრმად ნუ ემორჩილებით უღირებულებო მონების დირექტივებს. თქვენ ბევრნი ხართ, თქვენ განსაკუთრებული ფასი და წონა გაქვთ, დაიფასეთ დავი და დაგაფასებთ საზოგადოება. ნუ ეჩვენებით თქვენს შვილებს სამარცხვინო როლში. გაზარდეთ ღირსეულ მოქალაქეებად, ნუ გაზრდით მორჩილ ფარად.
პოლიცია ერთ-ერთი ის უმნიშვნელოვანესი ინსტიტუტია,რომელიც საზოგადოების სახეს აყალიბებს. გაუფრთხილდით საკუთარ პროფესიას და საკუთარ იმიჯს. ასე მთელ ქვეყანას გაუფრთხილდებით. საზოგადოების პატივისცემის გარეშე პოლიციელი ვერ იქნება თავის სიმაღლეზე. ყური მიუგდეთ საზოგადოებას და იცოდეთ, რომ თქვენთვის არავის წაურთმევია თავისუფლად ფიქრისა და აზრის გამოხატვის უფლება! პირიქით, თქვენ გამორჩეული ღირსება გაქვთ და გაუფრთხილდით მას.
დიდი მადლობა ყველა პოლიციელს, რომელიც სრული შეგნებითა და მართლაც ღირსეულად უძღვება საკუთარ პროფესიულ პასუხისმგებლობას!“, - წერს ანდრო ბარნოვი.