ვალერი გელაშვილის საქმეზე მიხეილ სააკაშვილის ადვოკატი სისხლის სამართლებრივი დევნის შეწყვეტას მოითხოვს.
როგორც გიორგი ჩივიაშვილმა განაცახადა, ეს მოთხოვნა ბრალდების დადგენილებაში ცდომილების საფუძველზე გაჩნდა. მისივე თქმით, ის საქმის განხილვისას ასევე დააყენებს შუამდგომლობებს გარკვეული მტკიცებულებების დაუშვებლად ცნობასთან დაკავშირებით.
ბრალდების მხარემ გუშინდელ პროცესზე წარმოადგინა დადგენილება, რომელზეც სასამართლომ მოითხოვა განმარტება, თუ რომელი წლის მოქმედი რედაქციით იყო ის წარდგენილი.
,,ბრალდების მხარემ დაადასტურა, რომ ეს იყო 2005 წლის მოქმედი რედაქციით, მაშინ, როდესაც იმ რედაქციაში საერთოდ არ არსებობს ის პუნქტი, რაც წერია აღნიშნულ დადგენილებაში და რაც ბრალად აქვს წარდგენილი მიხეილ სააკაშვილს. ამან გამოიწვია განმარტებების გაკეთება, რაზეც მქონდა ჩემი პოზიცია.
ეს კიდევ ერთხელ მიუთითებს იმაზე, რომ აბსოლუტურად პოლიტიკური პროცესი მიმდინარეობს, მაშინ, როდესაც ადამიანს ედავებიან 2005 წელს რაღაც კონკრეტულ ფაქტზე, რაც თავიდანვე უსაფუძვლოდ მიმაჩნდა. ამაში ასევე იკითხება ის, რომ მაშინ საერთოდ არ არსებობდა ის პუნქტი, რომელიც მითითებულია ბრალდების დადგენილებაში. საქმე გვაქვს წარმოუდგენელ ფაქტთან, როდესაც არ არსებობდა კანონით განსაზღვრული პუნქტი, მაგრამ მიხეილ სააკაშვილს ეს ბრალად აქვს წარდგენილი", - განაცხადა გიორგი ჩივიაშვილმა.
მისი თქმით, დაცვის მხარეს ექნება მთელი რიგი შუამდგომლობები, მათ შორის მტკიცებულებების დაუშვებლად ცნობის შესახებ და საქმის შეწყვეტის შესახებ. ვალერი გელაშვილის ცემის საქმეზე წინასასამართლო სხდომა 29 აპრილს განახლდება.
