„თავისუფლებისა და მხარდაჭერის ცენტრის“ ხელმძღვანელი ანი ნადარეიშვილი პრემიერის განცხადებას ეხმაურება, რომლის თანახმადაც ზუგდიდში ხალხს ქვები და ხელკეტები ნადარეიშვილის ოფისის აივნიდან დაუშინეს.
სოციალურ ქსელში ანი ნადარეიშვილი ვიდეოს ავრცელებს, სადაც ჩანს, რომ ოფისს აივანი არ აქვს.
„აგონიაში მყოფმა ღარიბაშვილმა დღეს განაცხადა, რომ ჩვენ ჩვენი ოფისიდან "მშვიდობიან" აქციას თურმე აივნიდან ვესროდით ქვებს რამაც გამოიწვია პროვოკაცია. ეს არის ჩვენი ოფისი, აივანი მაჩვენოს ქოსატყუილა ღარიბამ!“, - წერს ნადარეიშვილი.
პრემიერ-მინისტრი ზუგდიდში მომხდარ ფაქტს „ნაციონალური მოძრაობის“ მიერ მოწყობილ მიზანმიმართულ პროვოკაციას უწოდებს.
„აივნებიდან ხალხს ხელკეტები და ქვები დაუშინეს და ამის შემდეგ რეაქცია იყო ხალხისგანაც ნეგატიური. თუმცა ამ ხალხს აქვს ღირსება და თავმოყვარეობა. საზოგადოებამ ცხრა წელი აიტანა ის ძალადობა და საშინელი რეჟიმი, რომელიც საქართველოში იყო გამეფებული.
ჩვენ არ დაუშვებთ, რომ მოხდეს კიდევ ძალადობა. ამას ყველაფერს ზედმეტი დრამატიზება არ სჭირდება. რა თქმა უნდა ფაქტი უნდა გამოიძიოს შინაგან საქმეთა სამინისტრომ, რომ დადგინდეს დამნაშავე, მაგრამ ერთი შეხედვით ჩანს, რომ ეს იყო პროვოკაცია“, - განაცხადა პრემიერმა.
newposts.ge
