2017-02-03 13:46

მედიაჰოლდინგი „აფხაზეთის ხმა“ იწყებს კამპანიას საშუალო და მცირე ქართული სამეწარმეო ბიზნესის მხარდასაჭერად სახელწოდებით „ქართული ჯობია“.

პროექტის მიზანია ქართული წარმოების პოპულარიზაცია, რის შედეგადაც გაიზრდება ქართული პროდუქციის რეალიზაცია, ეს კი, თავის მხრივ, ხელს შეუწყობს ქართული ბიზნესის განვითარებასა და გაძლიერებას.

პროექტის ფარგლებში, მცირე და საშუალო ბიზნეს სექტორი, რომლებიც ადგილობრივ წარმოებაზე არიან ორიენტირებულნი, განვითარებისა და გაყიდვებისთვის საჭირო მხარდაჭერას მიიღებენ. პროექტში ჩართულ კომპანიებს საშუალება მიეცემათ შეღავათიან ფასებში განათავსონ რეკლამა, გაავრცელონ და ფართო საზოგადოებას წარუდგინონ ინფორმაცია თავიანთი პროდუქციის შესახებ. კომპანიის შესახებ ცნობადობის ამაღლება მოხდება რადიო ეთერის, სოციალური ქსელის და ვებგვერდის საშუალებით, რაც მათი პროდუქციის მასშტაბურ პოპულარიზაციას და გაყიდვების გაზრდას შეუწყობს ხელს.

ასევე დაგეგმილია წამახალისებელი ვიქტორინის (სახელწოდებით „აჩუქე ქართული“) შექმნა, სადაც გამარჯვებული მსმენელები მხოლოდ ქართული პროდუქციით დაჯილდოვდებიან. ეს კი ზემოთაღნიშნულ პროექტში ჩართულ პარტნიორ კომპანიებს საშუალებას მისცემს თავიანთი პროდუქცია უსასყიდლოდ გადასცენ პოტენციურ მომხმარებლებს და დაუმტკიცონ, რომ ქართული მართლაც ჯობია.

კამპანიის მიმდინარეობის შესახებ ანალიზი პერიოდულად გამოქვეყნდება რადიო „აფხაზეთის ხმის“ ვებგვერდზე, ასევე, გაშუქდება მედიაჰოლდინგში შემავალი რადიოების ეთერში.