2015-03-19 00:25

ლანჩხუთის სტადიონზე მომხდარი კურიოზული შემთხვევის სესახებ "გურიის მოამბე" წერს: მაყურებელი, რომელიც ადგილობრივი "გურიის" მეკარის სახელს "მიშა" სკანდირებდა, რაიონის გამგებელს მესამე პრეზიდენტის მომხრეები ეგონა და სტადიონი დატოვა.

"გურიის მოამბე" წერს, რომ შეცდომაში არამარტო ადგილობრივი ხელისუფლების წარმომადგენლები, პოლიციაც შევიდა, რომელმაც მობილიზაცია დაიწყო, რათა თავიდან აეცილებინათ მოსალოდნელი გართულებები. სინამდვილეში კი, გამოცემის ცნობით, ტაში, ოვაცია და შეძახილები: "მი-შა! მი-შა!" ლანჩხუთის "გურიის" მეკარეს მიშა გოგუაძეს ეკუთვნოდა, რომელმაც არაერთი "მკვდარი" ბურთი მოიგერია და აიღო. 

გამოცემა წერს, რომ ლანჩხუთის "გურიის" მწვრთნელმა, ყოველი შემთხვევისთვის მეკარე მაინც შეცვალა, რათა გაუგებრობა აღეკვეთა, მაგრამ მეკარე გასახდელისკენ უფრო ომახიანი შეძახილით "მი-შა! მი-შა!" გააცილეს.

"გურია" გათამაშების ერთერთ ლიდერს, გორის "დილას" მასპინძლობდა. "დილა" უტევდა, ის სამი ქულის წასაღებად იყო ჩასული, თუმცა, "გურიის" მეკარემ გუნდს ქულა მოუპოვა, რის გამოც მაყურებელთა მოწონება დაიმსახურა. ევგრაფი შევარდნაძის სახელობის სტადიონზე ლანჩხუთში დღეს მატჩის სანახავად 2 ათასამდე მაყურებელი მივიდა. 

შენიშვნა: ფოტო გადაღებულია ლანჩხუთის სტადიონზე, 2012 წელს და მასალაში აღწერილ ამბავს უკავშირდება მხოლოდ თემატურად

წყარო