მთავრობა ქამრების შემოჭერას იწყებს, თუმცა მინისტრებიდან მხოლოდ დავით სერგეენკომ იცის, რომ საკუთარ უწყებაში ხარჯების დაზოგვით ეროვნული ვალუტის გამყარებას ხელს 70 ათასი ლარით შეუწყობს.
ფინანსთა მინისტრი კი ვერ აკონკრეტებს რამდენი ლარით დაიზოგება საბიუჯეტო დანახარჯები. ასევე მინისტრების დიდ ნაწილს ამ დრომდე არ აქვს პასუხი, რა ნაწილში აპირებენ ე.წ. ქამრების შემოჭერას. უწყების პირველი პირების ნაწილი ამას სამინისტროს მუშაობის რთული სპეციპიკით ხსნის, ნაწილი კი უწყებებში ბიუჯეტის გადახედვას არ ეთანხმება.
მთავრობის სხდომაზე ეკონომიკურმა გუნდმა სავალუტო ფონდის რეკომენდაციებს უპასუხა და მთავრობა ბიუჯეტის შემცირებას ადმინისტრაციული შენობების რემონტზე, რბილ ავეჯსა და ახალ ავტომანქანებზე უარის თქმის ხარჯზე აპირებს.
ფინანსთა სამინისტროს გეგმის მიხედვით, სამინისტროებსა და მთავრობას დაქვემდებარებულ იურიდიულ პირებს ხარჯების ხელახლა წარსადგენად ვადა 16 მარტამდე აქვთ.
ფინანსთა სამინისტრო მივლინებების გადახედვის მომხრეა. ცვლილებები მინისტრის მტკიცებით წარმომადგენლობით ხარჯებსაც უნდა შეეხოს და ის 20%-ით უნდა შემცირდეს.
