-
2014-02-04 13:48
„იმედის“ ჟურნალისტმა გურამ როგავამ ბიძინა ივანიშვილს შეუსრულებელი დაპირებების ჩამონათვალის სახით, „კვირის ქრონიკაში“ 2012 წლის ივნისში დაბეჭდილი მისივე ციტატა წაუკითხა.
„ჩვენი ხელისუფლებაში მოსვლის შემდეგ, როცა მოვსპობთ მონოპოლიებს, ნახავთ, როგორ დაიწევს ფასი ძალიან ბევრ პროდუქტზე: პირველადი მოხმარების პროდუქტებზე, ბენზინზე, ელექტროენერგიაზე, სადაც ხელოვნურად აქვთ გაზრდილი ფასები და ფულს აკეთებენ. დაინახავთ, როგორ შემცირდება გაზის ფასი, სადაც, როგორც მე ვიცი, ესენი წილში ზიან...“.
ამასთან, ჟურნალისტმა ბიძინა ივანიშვილს კონკრეტული დაპირებაც შეახსენა იმასთან დაკავშირებით, რაც მან ზუგდიდში წინასაარჩევნოდ განაცხადა:
„თქვენ განაცხადეთ, რომ 2013 წელს დაიწყებოდა და ერთ წელიწადში დასრულდებოდა ზუგდიდში სამედიცინო ცენტრის მშენებლობა, რაც არ შესრულებულა“, – თქვა გურამ როგავამ.
საპასუხოდ ყოფილმა პრემიერმინისტრმა განაცხადა, რომ ზუგდიდთან დაკავშირებით ჟურნალისტს არასწორი ინფორმაცია აქვს:
„ჩემს დროს დაწყებული იყო პროექტის შემუშავება და ეს პროცესი, როგორც ვიცი, გრძელდება. შეგიძლიათ გადაამოწმოთ. სხვაგვარად კი, ასე მალე სამედიცინო ცენტრები არ შენდება. ერთ წელიწადში ნაციონალები აშენებდნენ და როგორ აშენებდნენ, კარგად ვიცით – აგერ, მათი აშენებული იუსტიციის სახლი პირველივე ქარზე დაზიანდა“, – აღნიშნა ყოფილმა პრემიერმა.