2015-02-20 12:44

რეგიონული განვითარების მინისტრის მოადგილე გიორგი კობერიძე თანამდებობიდან ირაკლი ღარიბაშვილმა გაათავისუფლა.

გავრცელებული ინფორმაციით, კობერიძე „წყალმომარაგების სახელმწიფო კომპანიის“ ფინანსური დეპარტამენტის ხელმძღვანელის თამარ ფხოველიშვილის კორუფციულ სქემასთან კავშირშია, რომელმაც უკანონოდ 2 227 887 ლარი მიითვისა.

იგივე ინფორმაციით, არ არის გამორიცხული, რომ კობერიძეც დააკავონ. იგი 2012 წელს, სწორედ მაშინ მუშაობდა კომპანიის დირექტორის მოადგილედ, როცა ფხოველიშვილმა კორუფციული სქემა ამუშავა. დაუდასტურებელი ინფორმაციით, კობერიძე  ფხოველიშვილსა და მის მეუღლეს შესყიდვებზე კონტრაქტს პირდაპირ უფორმებდა და სახელმწიფო თანხების მითვისებაში ეხმარებოდა.

„კობერიძე მინისტრის, დავით შავლიაშვილის კადრი იყო...

როგორც წყარო ამბობს, რეგიონებისა და ინფრასტრუქტურის სამინისტროში ახლა დიდი პანიკაა.

აუდიტის დასკვნაში ამ სამინისტროს რამდენიმე მაღალჩინოსნის გვარი ფიგურირებს და ამ საქმეებს პროკურატურა იძიებს. სავარაუდოდ, სამინისტროს რამდენიმე მაღალჩინოსანს დაიბარებს პროკურატურა, მანამდე კი, ალბათ, წმენდა იქნება და არაერთ მაღალი თანამდებობის პირს დაატოვებინებენ პოსტს.

გადაჰყვება თუ არა ამ ყველაფერს მინისტრი დავით შავლიაშვილი? წყაროს ინფორმაციით, შავლიაშვილი კორუფციულ ტენდერებში გარეული არ არის, ვინ რა დოზით იყო გარეული, ეს ყველაფერი დეტალურად იცის ნოდარ ჯავახიშვილმა და შესაბამისად, ირაკლი ღარიბაშვილმაც.

დავით შავლიაშვილს საფრთხე არ ემუქრება, მაგრამ შესაძლოა, მინისტრის პოსტის დატოვება მოუწიოს, რადგან მის თვალწინ სამინისტროში კორუფციული გარიგებების კასკადია და ვიდრე ჯავახიშვილი არ დაუსვა მოადგილედ ღარიბაშვილმა „კორუფციასთან ბრძოლის დარგში“, მანამდე კორუფციის ერთი ფაქტიც კი არ გამოაშკარავებულა ამ სამინისტროში“, - წერს „ალია“.