2015-02-17 05:44

"აფხაზეთის ხმასთან" ექსკლუზიურ ინტერვიუში საქართველოს თავდაცვისა და შს მინისტრი ბაჩო ახალაია აცხადებს, რომ არსად არ ეჩქარება, მაგრამ ციხიდან იმაზე ადგე გამოვა, ვიდრე ხელისუფლებას წარმოუდგენია.

მისივე თქმით, ყოველთვის იქ იყო, სადაც ისტორიის მნიშვნელოვანი ეტაპი იდგა, ახლაც იქაა და მომავალშიც სწორედ იქ დადგება, სადაც ქვეყანას დასჭირდება:

"როცა „ქურდულ სამყაროსთან“ ბრძოლა იყო უმნიშვნელოვანესი, რატომღაც, იქ აღმოვჩნდი, როცა არმიას ახალი ენერგია და წელში გამართვა სჭირდებოდა რუსული აგრესიის საშიშროების ფონზე, მაშინ იქ ვიყავი, ახლა, როცა ჩვენი ისტორიის მნიშვნელოვანი ეტაპი მიმდინარეობს ციხის გისოსების მეშვეობით, ახლა სწორედ აქ ვმუშაობ - ციხის საკანში. ხვალ იქ ვიქნები, სადაც ჩემს ქვეყანას გაუჭირდება და დავჭირდები. ასე რომ, მგონია, ჩემი საქმიანობის ყველაზე მნიშვნელოვანი ეტაპი ჯერაც წინ არის", - თქვა ბაჩო ახალაიამ.

"რაც შეეხება ჩემს გათავისუფლებას, ჯერ, პრინციპში, არასადაც არ მეჩქარება, მაგრამ გათავისუფლება ზუსტად ისეთი იქნება, როგორც პატიმრობა, ანუ ჩემი გათავისუფლება მოხდება მხოლოდ პოლიტიკური გადაწყვეტილების პირობებში, რადგან ჩემს პატიმრობას არანაირი კავშირი არა აქვს სამართალთან.

ან საერთოდ, რა მნიშვნელობა აქვს, რამდენი მომისაჯეს, 7 თუ 8 წელი, ხვალ კიდევ დაამატებენ... ზეგ რომ იწურებოდეს ვადა, დღეს ახალს დაამატებენ, ასე რომ, ეს წლები არაფერს ნიშნავს, თავისთავად.

მაგრამ ერთი ცხადია: ბევრად უფრო ადრე აღმოვჩნდები გარეთ, ვიდრე შეიძლება ეს ხელისუფლება გეგმავდეს თავის ოცნებებში.

სამომავლოდ კი, რა თქმა უნდა, იმას გავაკეთებ, რასაც მუდმივად ვაკეთებდი - შევეცდები, ჩემი წვლილი შვიტანო საქართველოს წინსვლასა და წარმატებებში.".