„ის ჩემი ცხოვრების არჩევანი სწორედ იმიტომაც გახდა, რომ ასეთია: ძალიან მაგარი და საუკეთესო პიროვნება“, - ასე პასუხობს „აფხაზეთის ხმასთან“ ექსკლუზიურ ინტერვიუში ბაჩო ახალაია შეკითხვას, აღმოჩნდა თუ არა მისთვის მოულოდნელი მეუღლის შემართება და ბრძოლისუნარიანობა.
„ანი ჩემი დიდი ხნის წინანდელი აღმოჩენაა, ასე რომ სრულებითაც არ გამკვირვებია მისი დღევანდელი მოქმედება და ქცევა, მისი ადეკვატურობა და კომპეტენტურობა. ის ჩემი ცხოვრების არჩევანი სწორედ იმიტომაც გახდა, რომ ასეთია: ძალიან მაგარი და საუკეთესო პიროვნება“, - ამბობს ბაჩო ახალაია „აფხაზეთის ხმასთან“ საუბარში, ხოლო შეკითხვაზე, რა აკლია და რის დეფიციტს განიცდის ციხეში, პასუხობს:
„საინტერესო კითხვაა... ვიღაცეები, სამწუხაროდ, უნდა გავახარო: ყველაფრის დეფიციტს განვიცდი, აბსოლუტურად ყველაფერი მაკლია, რადგან ციხე კრიმინალების ადგილია, მე კი კრიმინალი ნამდვილად არ ვარ. ყველაფრის მიუხედავად, რაღაც სამუშაო გარემო მაინც გამოვიდა ჩემს საკანში და დროს ფუჭად ნამდვილად არ ვკარგავ“.
მისივე თქმით, სასამართლო პროცესების პირველ ეტაპზე მშობლებს სთხოვა, სხდომებს არ დასწრებოდნენ:
„თავდაპირველ ეტაპზე ნამდვილად ვთხოვე მშობლებს, არ დასწრებოდნენ პროცესებს, რადგან უბრალოდ, ამ საქციელით მინდოდა, მათ მოვფრთხილებოდი, სრულებითაც არ ვთვლიდი საჭიროდ საათობით ესმინათ პროკურატურის საშინელი ზღაპრებისთვის, რომელიც ამ ხელისუფლების პირობებში ნამდვილად „ბოროტი მხატვრული კითხვის“ სეანსებად შეიძლება მოიხსენიო.
როგორც ტელევიზიით, ასევე პროცესებზე, პროკურორები კითხულობდნენ რაღაც გამაოგნებელ, ტრაგიკულ ისტორიებს, რომლებსაც საბოლოო ჯამში საქმესთან არანაირი შეხება არა აქვს. ეს ძალიან პრიმიტიული ქცევაა, რომლითაც თვლიან, რომ რაც უფრო საშიშად და სასტიკად აღწერენ მოვლენებს, საზოგადოებას მით უფრო დაშოკავენ, საქმეებში კი სულ სხვა რამეებია წარმოდგენილი.
მოგვიანებით ყველა სასამართლო პროცესი მე თვითონ დავუქვემდებარე ლოგიკურ კონტროლს, პოლიტიკურად ანგაჟირებულ, გაუნათლებელ პროკურორებს და მოსამართლეებს ლოგიკური პაექრობისა და კამათის უნარი არ აღმოაჩნდათ, შესაბამისად, მათი ქცევებიც სასაცილო გახდა, მერე კი ნამდვილად არ ვდარდობდი, რომ ჩემი ახლობლები სხდომებს ესწრებოდნენ...“
