2015-02-16 20:48

 მომღერალი ინდირა ჯგერენაია იმ იმედგაცრუებასა და წარუმატებელ სასიყვარულო ისტორიაზე საუბრობს, რომელიც საყვარელი ადამიანის  ეჭვიანი ბუნების გამო აღმოცენდა.

„გული მწყდება იმაზე, რომ სამი წლის განმავლობაში ვერ გავიცანი ადამიანი და სულ სხვა ვინმე შემრჩა ხელში.

პირველი წელი იდეალური იყო, მეორე წელიც კარგი იყო. ბოლო სამი თვე კი მეგონა, სულ სხვა ადამიანთან ვცხოვრობდი.

დღეს ძალიან ვნანობ, რომ იმ ადამიანის გულისთვის ჩემი ოჯახის წინააღმდეგ წავედი. ვგულისხმობ იმას, რომ ჩემები ჩემი მასთან ერთად ცხოვრების წინააღმდეგნი იყვნენ. მიხარია ის, რომ ქორწინებაში არ ვყოფილვართ. მე რომ შვილი მყოლოდა, მისი ხათრით ამ რაღაცების დათმობა მომიწევდა. მარტოხელა დედობაზე გაფიქრებაც არ მინდა.

ჩვენი ურთიერთობა "ნიჭიერის" პერიოდში დაიძაბა. საუბრებს ჩხუბით ვასრულებდით. ჩვენს სახლში ლეწვა-მსხვრევის ხმა ისმოდა. ამის გაგრძელება შეუძლებელი იყო.

ეს გაუგებრობა დროის უქონლობის გამო გაჩნდა. დეპრესიაში მყოფი სახლში ვიჯექი და გვერდით მყავდა. რომ გამოვკეთდი და პროექტში ვმონაწილეობდი, პრობლემები შეგვექმნა. ისეთი ეჭვიანი გახდა, რომ მის გვერდით ცხოვრება გაუსაძლისი იყო. იყო უაზრო ეჭვიანობის ფრაზები - რატომ გეჯდა გვერდით? ასე ახლოს რატომ დაგიჯდა? რატომ ესაუბრე?

ასეთი ელემენტარული რამიდან იმხელა ჩხუბამდე მივდიოდით, წყობიდან გამოვყავდი. ღამით მაღვიძებდა და იგივე კითხვებს მისვამდა, რასაც დღისით, ეგონა ძილში „სიმართლეს“ დამაცდენინებდა. „ფეისბუქზე“ კითხულობდა კომენტარებს, პასუხებს ჩემს ნაცვლად თვითონ წერდა.

ნიკა გვარამიას გადაწყვეტილებით „ნიჭიერში“ 10 ათასი ევრო რომ მოვიგე, „ფეისბუქზე“ ჭორაობა ატყდა - რატომ მისცა ამდენი ფული, საყვარლები ხომ არ არიანო? გაღიზიანდა ამ კომენტარებზე. ამ დროს თვითონ იცოდა, ნიკასთან როგორი მორიდებული ურთიერთობაც მაქვს, მაგრამ ეჭვებში ვარდებოდა. მარტივად იცხოვრე-მეთქი ვურჩევდი, მაგრამ ეს ვერ მოახერხა, გულში იხვევდა ბევრ რამეს.

ხალხი რომ დიდ ყურადღებას მაქცევდა, გიჟდებოდა. რესტორანში ვიყავი მეგობრებთან ერთად, იქ მოვარდა და „კონცერტები“ ჩამიტარა. უკვე გაუსაძლისი გახდა მის გვერდით ყოფნა. ბევრი სიკეთე გამიკეთა, მძიმე დროს გვერდით მედგა. მასზე დამოკიდებული ვიყავი. მივენდე, მაგრამ ავადმყოფური ეჭვიანობით არც მე, არც ოჯახის წევრები და არც მეგობრები არ დაგვზოგა.

ეს ავადმყოფობაა, სიყვარული არ არის. ზოგი კაცის ბუნებაში ეს დევს და ადრე თუ გვიან ამჟღავნებს. თუ პირველი გამოვლინება აპატიე, მერე სულ გამოამჟღავნებს და ჯოჯოხეთში გაცხოვრებს. ამიტომ, ერთხელაც კარი გავუღე და გადი, შენი დანახვა აღარ მინდა-მეთქი, ვუთხარი. არის რაღაც, რასაც ვერ ვპატიობ. მას ვერ წარმოედგინა თუ მე ამ გადაწყვტეილებას მივიღებდი.

ბოდიშები მიხადა, პატიება ითხოვა, მაგრამ ეს უკვე გვიანია. ერთხელ რომ გატკენს, ის მეორედაც გატკენს და ასე გააგრძელებს. ამიტომ იქვე უნდა გაწყვიტო ურთიერთობა. ძნელია, მის გარეშე ცხოვრება მიჭირს, მაგრამ იმედია, ამ ყველაფერს დავძლევ,“ - აცხადებს ინდირა ჯგერენაია.

„პრაიმ-ტაიმი“