2014-01-31 14:34

გავრცელებული ინფორმაციის თანახმად, ცნობილი ავტომრბოლელი მიხაელ შუმახერი გუშინ კომიდან გამოვიდა.

სამედიცინო დაწესებულება გრენობლის სამედიცინო პერსონალის განცხადებით, ნევროლოგიური ტესტირების ფარგლებში სპორტსმენმა თვალები რამდენიმეჯერ გაახილა.

ექიმების განცხადებით, ავტომრბოლელის ჯანმრთელობის მდგომარეობა დამაიმედებელია. სპორტსმენი სხვადასხვა მკურნალობებეზე დადებითად რეაგირებს, მისი მდგომარეობა კი არ გაუარესებულა.

მიუხედავად აღნიშნულისა, სამედიცინო პერსონალი გარკვეული გარანტიების გაცემისგან თავს იკავებს. სპეციალისტების განცხადებით, ერთი თვის მანძილზე კომაში ყოფნა, კრიტიკული დროა და მსგავსი ვითარების შემდეგ კომიდან გამოსვლის შანსი ძალიან დაბალია.

„ფორმულა 1“-ის ლეგენდარული ავტომრბოლელი კომაში გასული წლის 29 დეკემბრიდან იმყოფება. შუმახერმა თავის ქალის მძიმე დაზიანება მაშინ მიიღო, როცა იგი თხილამურებით საფრანგეთის ალპების ერთ-ერთ კურორტზე სრიალებდა. დაცემის შემდეგ, სპორტსმენი ვერტმფრენით დაუყოვნებლივ სამედიცინო დაწესებულებაში გადაიყვანეს.

შუმახერს თავის ქალაზე ორი ოპერაცია ჩაუტარდა, რათა შიდაქალის წნევის დაწევა შესაძლებელი ყოფილიყო. იმისათვის, რათა ტვინის შეშუპება შეემცირებინათ, სამედიცინო პერსონალმა მიიღო გადაწყვეტილება, ავტომრბოლელი ხელოვნური კომის მდგომარეობაში გადაეყვანათ.

მიუხედავად გარკვეული დადებითი დიაგნოზებისა, სპეციალისტების ნაწილი ვარაუდობს, რომ მიხაელ შუმახერმა შესაძლოა ვეღარასდროს გაიაროს.