2015-01-07 17:08

სიღნაღის ქორწინების სახლი დაქორწინების მსურველებს 24 საათის განმავლობაში ემსახურება.

როგორც სახლის დირექტორი რუსუდან ოტიაშვილი ამბობს,  სიღნაღში ქორწინების მსურველი ბევრია.- ხელმოწერა თითქმის ყოველდღე ხდება.

დღის განმავლობაში, ქორწინების რეგისტრაციაში 16-17 წყვილიც გაუტარებიათ.

„ყოველდღე, 24 საათის განმავლობაში ვმუშაობთ. წყვილებს დარეგისტრირება ნებისმიერ დროს შეუძლიათ, მაგრამ თუ ადგილი "დაჯავშნულია", უცებ მოსული წყვილისთვის დროს ვერ გამოვნახავ - ცოტა ხნით ლოდინი მოუწევთ.

ქორწინების რეგისტრაციაც გამარტივდა. მაგალითად - ქორწინების დამაბრკოლებელი გარემოების (ანუ ქორწინებაში იმყოფებოდა თუ არა) შესახებ ცნობა იყო საჭირო. ახლა ეს ცნობა აღარ სჭირდებათ. თან მხოლოდ პასპორტი უნდა იქონიონ. საქართველოს მოქალაქეებს პირადობის მოწმობები და 2 სრულწლოვანი მოწმე სჭირდებათ. თანხის (50 ლარი) გადახდა ადგილზევე შეუძლიათ.

ქორწინების რეგისტრაციისთვის სიღნაღში საკმაოდ ბევრი ცნობილი სახე მოდის - პოლიტიკოსები, ყოფილი პოლიტიკოსები, მსახიობები, მოცეკვავეები, რადიოწამყვანები...

მათი უმეტესობა ღამით არჩევს დაქორწინებას.  ღამით სიღნაღი ძალიან ლამაზია! ზოგს ბილეთები „დაჯავშნული“ აქვს და ქორწინების რეგისტრაციის შემდეგ, პირდაპირ უცხოეთში მიფრინავს თაფლობის თვის გასატარებლად.

ზოგი პოლიტიკოსი ღამით იმიტომ აწერს ხელს, რომ არ „გამოჩნდეს“ ანუ ქორწინების გახმაურება არ სურს...“ - აღნიშნა რუსუდან ოტიაშვილმა.

gzapress.ge