2014-01-30 13:31

უკრაინის პრეზიდენტი, ვიქტორ იანუკოვიჩი სამედიცინო დაწესებულებაშია მოთავსებული. პრეზიდენტის ადმინისტრაციის მიერ გავრცელებული ინფორმაციის თანახმად, იანუკოვიჩის გადაყვანა საავადმყოფოში გვიან ღამით გახდა საჭირო.

აღნიშნულის შესახებ უკრაინული მედია იუწყება. როგორც ცნობილია, იანუკოვიჩს მწვავე რესპირატორული დაავადება და მაღალი სიცხეები აქვს. მის სიცოცხლეს საფრთხე არ ემუქრება, თუმცა პრევენციის მიზნით პრეზიდენტი სამედიცინო პერსონალის ზედამხედველობის ქვეშ იმყოფება.

„პრეზიდენტს მწვავე რესპირატორული ვირუსი და მაღალი ტემპერატურა აქვს“, – აღნიშნულია უკრაინის პრეზიდენტის ოფიციალურ ვებგვერდზე.

ბოლო პერიოდში გრიპის ვირუსი ბევრ პოლიტიკოსსა და ცნობილი პირს შეეყარა როგორც უკრაინაში, ასევე რუსეთსა და საქართველოშიც. მათ შორისაა საქართველოს ყოფილი პრემიერმინისტრი ბიძინა ივანიშვილი, რომელმაც ვირუსის გამო არასამთავრობო ორგანიზაციის პრეზენტაციაც გადადო.