2014-12-22 12:55

არასაპარლამენტო ოპოზიციისა და პრეზიდენტის შეხვედრის ძირითადი თემა იყო საკითხი - უნდა ჩავიდეს თუ არა გიორგი მარგველაშვილი მოსკოვში.

„გაერთიანებული დემოკრატების“ ერთ-ერთი ლიდერის, დიმიტრი ლორთქიფანიძის თქმით, შეხვედრის დაწყებისთანავე ოპოზიცია ორ ბანაკად გაიყო.

„შეხვედრაზე ვიყავით: მე, ჯონდი ბაღათურია, სოსო შატბერაშვილი, კახა ძაგანია, ფიქრია ჩიხრაძე, მამუკა კაციტაძე, ბაჩუკი ქარდავა, ზურაბ ხარატიშვილი და პაატა დავითაია.

მივედით თუ არა, ეგრევე ორ ბანაკად გავიყავით - მაგალითად, „მემარჯვენეები“ ფიქრობენ, რომ არ უნდა შეხვდეს, სანამ დასავლეთს სანქციები აქვს დაწესებული. ეს არის ფიქრია ჩიხრაძის პოზიცია.

მე განსხვავებული პოზიციით მივედი, დავუსაბუთე პრეზიდენტს, რომ შეხვედრა აუცილებელია იმის გათვალისწინებით, რაც ჩვენს ქვეყანას აწუხებს - დევნილების დაბრუნება და ტერიტორიული მთლიანობის აღდგენა.

ასევე მისახედია ჩვენი ემიგრაცია რუსეთში. აქ ძალიან ბევრი კომპონენტია. სხვათა შორის, პრეზიდენტმა თქვა: პასუხი უნდა იყოს დადებითი, შევხვდები, მაგრამ დღის წესრიგი იქნება მკაფიო და გასაგებიო. 

მე დავუსვი შეკითხვა: როგორ მოირგეთ კონსტიტუცია, რამდენად კომფორტულად გრძნობთ თავს, რამდენად ხართ ნეიტრალური არბიტრი და საქართველოს წარმომადგენელი საგარეო საკითხებში-მეთქი?

მან აღიარა, საგარეო ვექტორის განმსაზღვრელი მე ვერ ვარ, ამ მხრივ პრიორიტეტი მთავრობას ენიჭებაო.

აქედან გამომდინარე, ჩემი აზრით, ის არ უნდა შეხვდეს პუტინს. ეს ის თემაა, რომელსაც არც პოლიტიკურ დონეზე დაუთმობს პრემიერ-მინისტრი და არც კონსტიტუციურად,“ - აღნიშნა დიმიტრი ლორთქიფანიძებ. 

„ქრონიკა“