2014-01-28 15:27

რუსეთში უკრაინის მოვლენების მიმართ ორგვარი მიდგომა გამოიკვეთა: ერთი მხრივ, დონის კაზაკები აცხადებენ, რომ უკრაინის ხელისუფლების დასახმარებლად არიან მზად, მეორე მხრივ კი, რუსეთის დემოკრატიული ოპოზიციის ფრთა კიევის ევრომაიდნის მხარდამჭერ კომიტეტს აყალიბებს.

მაგალითად, სახელმწიფო დუმის დეპუტატი და იმავდროულად, უშიშროების კომიტეტის წევრი, კაზაკთა გენერალი და ატამანი ვიქტორ ვოდოლაცკი წარმოუდგენლად მაღალ რიცხვს ასახელებს იმ კაზაკებისას, რომლებიც მზად არიან, უკრაინელი კაზაკების მოწოდების შემთხვევაში, „უკრაინაში ექსტრემიზმის აღსაკვეთად“ გაემგზავრონ. ვოდოლაცკის თქმით, ასეთი დონის კაზაკი რუსეთში 760 ათასია.

„თუკი 2008 წელს ყირიმში გამოსვლების დროს (ნატოს საწინააღმდეგო აქციები, - რედ.) ორი დღის განმავლობაში 5 ათასი კაცი შევაგროვეთ, ახლაც შეგვიძლია, მაგდენი და უფრო მეტნი მოვგროვდეთ, მთავარია, რა ამოცანების წინაშე ვიდგებით და რამდენი დავჭირდებით ჩვენს უკრაინელ ძმებს.

დღეს ალექსანდრე დიმიტრის ძე ბეგლოვის ბრძანებას დაქვემდებარებული 760 ათასი კაზაკი გვყავს და ეს რუსეთის სახელმწიფო რეესტრშია რეგისტრირებული. თუ ბეგლოვის ბრძანება იქნება, ყველა წავა უკრაინაში“, - აცხადებს დეპუტატი.

მეორე მხრივ კი, მოსკოვში შეიქმნა „მაიდნის სოლიდარობის კომიტეტი“ და მასში შევიდნენ დემოკრატიული ოპოზიციის წარმომადგენლები: მიხეილ ანშაკოვი, ანდრეი პიონტკოვსკი, ლოლიტა წარია, ოლგა კურნოსოვა, პავლე შელკოვი, ასევე უკრაინელი რეჟისორი ვლადიმირ ლიზუნი და სხვები.