2014-11-21 23:10

„არავითარი მნიშვნელობა არა აქვს, სად წავიდა ემზარ კვიციანი, მასე გიორგი სააკაძე ირანში წავიდა, მაგრამ წავიდა საქართველოს სასარგებლოდ“, - განაცხადა „ობიექტივის“ დამფუძნებელმა ირმა ინაშვილმა ჟურნალისტ ნინო ბორჩხაძის შეკითხვის პასუხად, რატომ წავიდა ემზარ კვიციანი რუსეთში, თუ რუსეთი მტერი იყო.

გადაცემაში „რეაქცია“ ნინო ბორჩხაძემ განაცხადა, რომ ალოგიკურია, როცა ემზარ კვიციანის გმირობაზე საუბრობენ, რადგან თუ ის წლების განმავლობაში ებრძოდა აფხაზ ბოევიკებსა და რუსების დესანტს, როგორ აღმოჩნდა რუსეთში, რომელიც იყო მტერი: „ყველას კარგად გვახსოვს, რომ „ორტ“-ზე ემზარ კვიციანს მისცეს პირდაპირი ეთერი, რაც ხდება ძალიან იშვიათ შემთხვევებში, მან პირდაპირ ეთერში ისაუბრა კოდორის სპეცოპერაციაზე და განაცხადა, რომ თავისი ხელით ჩამოხსნა ნიღაბი ერთერთ სპეცრაზმელს და ის აღმოჩნდა ზანგი... ამოიღეთ ეს კადრები“, - განაცხადა ნინო ბორჩხაძემ, რომელსაც ირმა ინაშვილი შეეკამათა.

ინაშვილის რეპლიკას ემზარ კვიციანისა და ემზარ კვიციანის შედარების შესახებ ნინო ბორჩხაძის პასუხი მოჰყვა: „ირმა, შენ რატომ იმეორებ ერთი-ერთზე რუსული პროპაგანდის პოზიციას, ეს მე არ მესმის... შენგან მიკვირს და ირაკლი ბათიაშვილისგან, მტრის პროპაგანდას იმეორებთ...“.

დებატებში მოგვიანებით ყოფილი პოლიციელი, „სამართალდამცველთა დაცვის ლიგის“ წარმომადგენელი ირაკლი ფირცხალავა ჩაერთო:

„ემზარ კვიციანი, სხვათა შორის, აფხაზეთში იყო ძებნილი... ჯერ ის 1982 წელს იყო გასამართლებული, გასამართლებული იყო ძროხის ქურდობისთვის, მერე 1984 წელს ის ვოლგოგრადის სასამართლომ გაასამართლა, 1990 წელს მურმან სიგუა, ანუ ის აფხაზი პირი, ვინც აფხაზურ ეროვნულ მოძრაობას ჩაუდგა სათავეში, ემზარ კვიციანმა და მისმა დისშვილმა მოკლეს და ამის შემდეგ ის იყო აფხაზეთში ძებნილი. ის აფხაზეთის გავლით ჩავიდა სოჭში, ანუ რუსეთში. თავად განსაჯეთ, როცა ადამიანი ძებნილია, მას აკავებენ საზღვარზე...“, - განაცხადა კრიმინალური პოლიციის ყოფილმა უფროსმა ირაკლი ფირცხალავამ.