2014-10-30 15:47

ჯანდაცვის სახელმწიფო პროგრამა 2013 წლის მარტიდან ამოქმედდა.

ყოველ შემთხვევაში ასე გვარწმუნებს ჩვენი ჯანდაცვის მინისტრი და მას შემდეგ უთო რომ უთოა, იქიდანაც კი გაიგებ, რომ პროგრამაში საქართველოს ყველა მოქალაქეა ჩართული.

არადა, ბატონებო, სულაც არ ყოფილა ასე. ამაში მას შემდეგ დავრწმუნდით, რაც ინფორმაცია ჯანდაცვის სამინისტროს ცხელ ხაზზე გადავამოწმეთ.

როგორც აღმოჩნდა, ჰაერში არიან ის პირები, ვინც სახელმწიფო პროგრამის ამოქმედების მომენტისთვის რომელიმე სადაზღვევო კომპანიაში კორპორატიული ან სულაც საკუთარი სახსრებით იყო დაზღვეული და მერე რა, თუ ამ დაზღვევის ვადა კარგა ხანია გასულია.

სამინისტრომ ასეთ კატეგორიას სახელმწიფო დაზღვევა ისე გაუუქმა, რომ ისინი საქმის კურსში არც ჩააყენა. არადა, თავის დროზე ჟურნალისტებმა აღნიშნულ თემაზე შეკითხვა ტელეეთერში დასვეს და პასუხი იყო დადებითი, რომ ასეთი პირები პროგრამაში მოხვდებოდნენ. არგუმენტად ის ფაქტი დასახელდა, რომ პირი დაზღვევის ფინანსებს საკუთარი ჯიბიდან იხდიდა.

ასეც რომ არ ყოფილიყო, დაზღვევით მოსარგებლე პირი დამზღვევ კომპანიასთან ხელშეკრულებას მისი ვადის ამოწურვამდე ვერც გაწყვეტდა.

ამით ისარგებლა სამინისტრომ, საკუთარი ფინანსებით დაზღვეული ადამიანები თავისი დაზღვევიდან ამოყარა და კანონმდებლობაც გამოაცხო `ინტრიგანი~ მოქალაქეების თავიდან მოსაშორებლად:

თუკი ეგ დაზღვევა ამოგეწურათ და ჩვენი მოგინდათ, მიდით სადაზღვევო კომპანიაში, წამოიღეთ ცნობა, რომ დაზღვევა აღარ გაქვთ, განცხადება დაწერეთ ჯანდაცვაში და ამ დროისთვის სული თუ არ გაგძვრათ, შეიძლება მიიღოთ საყოველთაო დაზღვევის არა საბაზისო, არამედ მინიმალური პაკეტი, რადგან `კოლექტივში~ თავიდან არ ხართო.

დღეს შეიძლება ისიც წამოგაძახონ, სანამ ბუხარზე გეძინა, მაგ პროგრამით ამდენმა და ამდენმა ათასმა ადამიანმა ისარგებლაო. ისარგებლა და თქვენც სულ მშვიდობაში მოგახმაროთ ღმერთმა ეგ პროგრამა.

პროგრამა იქით იყოს და ამ ინფორმაციის გავრცელების შემდეგ ხალხზე ხრუნვის პრეტენზიის მქონე ხელისუფლებისა და პირადად მინისტრის მიმართ ბუნებრივია, რამდენიმე კითხვა იბადება:

- იცით კი თქვენ რას ნიშნავს სიტყვა - საყოველთაო?

- თუ იცით, მაშინ ახსენით, სა-ყოველ-თა-ო პროგრამაზე ხელი ყველას რატომ არ მიუწვდება?

- და თუ საქართველოში ადამიანები საყოველთაო ჯანდაცვის პროგრამის გარეთ დარჩნენ, გამოდის ისინი სხვა ქვეყნის, თუნდაც ზიმბაბვეს მოქალაქეები არიან?

- რატომ „მინიმალური პაკეტი“ - სახელმწიფოს მინიმალურად აქვს ჩაყოფილი ხელი მათ ჯიბეში და იმ გადასახადებით, რომელიც ჯერ კიდევ ორი წლის წინ უნდა შემცირებულიყო, მინიმალურად ყვლეფს?

- რატომ „მინიმალური პაკეტი“, როდესაც ჩვენი ჩინოვნიკები მინიმალურს არაფერს ჯერდებიან და ყველაფერი მაქსიმალური უნდათ, მათ შორის მობილურებიც...

რატომ, რატომ, რატომ...