ამ დროისთვის კიევის ცენტრი ისევ ალშია გახვეული. ევრომაიდნის ლიდერთა ინფორმაციით, „ბერკუტის“ შეტევა უკვე დამოუკიდებლობის მოედანზე გაგრძელდება.
ოპოზიციის წარმომადგენლები ამ დრომდე ვერ აკონკრეტებენ შეტაკებისას დაღუპულთა ზუსტ რიცხვს. არის მონაცემები, რომ სნაიპერებმა დამიზნებით ესროლეს დემონსტრანტებს, რამაც ორი აქტივისტის გარდაცვალება გამოიწვია.
კიდევ ორი დაღუპულის შესახებ ინფორმაცია უკრაინულმა მედიამ გაავრცელა. მედიასაშუალებათა ნაწილი წერს, რომ 4 ადამიანი დაიღუპა, მეორე ნაწილის ინფორმაციით, 5 ადამიანია დაღუპული.
აქტივისტების დაღუპვის გამო შეშფოთება გამოთქვა ჟოზე მანუელ ბაროზომ, რომელმაც სოციალურ ქსელში დაწერა, რომ ხელისუფლებასა და დემონსტრანტებს დიალოგისკენ მოუწოდებს:
"შეშფოთებული ვართ, უკრაინაში მოვლენების განვითარებით. შოკირებული ვარ, აქტივისტების დაღუპვის გამო და სამძიმარს ვუცხადებთ მათ ოჯახებს, მოვუწოდებთ თავშეკავებისკენ და გონივრული ნაბიჯების გადადგმისკენ , რათა თავიდან აირიდონ ვითარების ესკალაცია“, - წერს ბაროზო. ვრცელდება ინფორმაცია, რომ უკრაინაში მიმდინარე მოვლენების გამო ევროსაბჭოს საპარლამენტო ასამბლეა რიგგარეშე წესით შეიკრიბება.
