-
2014-01-22 10:38
კიევის ცენტრში „ბერკუტის“ მოულოდნელმა გადანაცვლებამ ევრომაიდნისკენ შეტაკებები გამოიწვია. თბილისის დროით 10:27 საათზე კიევის ცენტრში სროლის ხმა ისმოდა.
„ბერკუტმა“ შტურმი მოულოდნელად დაიწყო: ოპოზიციის ლიდერები და ჟურნალისტები კიევში დაღუპული ევრომაიდნელის ცხედრის ექსპერტიზის შედეგებს ელოდებოდნენ, რომლის გარდაცვალების მიზეზებზე სხვადასხვა ვერსია ვრცელდებოდა, როცა ძალოვნებმა გრუშევსკიდან ევრომაიდნისკენ გადაინაცვლეს და მისადგომებთან განლაგდნენ.
მასალის გამოქვეყნების წუთებისთვის კიევის ცენტრში სროლის ხმა ისმის: „ბერკუტმა“ შეძლო გრუშევსკის ქუჩის გაწმმენდა და მომიტინგეების გადაწევა ევრომაიდნის მიმართულებით. სპეცრაზმმა რეზინის ტყვიები და ხმოვან–მანათობელი ყუმბარები გამოიყენა, ევრომაიდნელები ხელკეტებითა და ფარებით, ასევე ე.წ. მოლოტოვის კოქტეილებით არიან შეიარაღებული და სპეცრაზმის წინააღმდეგობის გასაწევად მზად არიან, თუმცა, ამ დროისთვის „ბერკუტი“ ევრომაიდანს არ უტევს.
„რუსთავი2“–ის ჟურნალისტის ცნობით, რამდენიმე დემონსტრანტი ბერკუტელებმა მის თვალწინ სასტიკად სცემეს. თამარ ნუცუბიძის თქმით, „ბერკუტის“ პირველი შეტევის შემდეგ აქტივისტებმა გრუშევსკიდან უკან დაიხიეს, მაგრამ წინა რიგებს უკანა რიგებიდან მიეშველნენ და მოხალისე თავდაცვითი რაზმის წევრები „ბერკუტს“ მაქსიმალურად უწევდნენ წინააღმდეგობას. ამის მიუხედავად, გრუშევსკის ქუჩაზე სტადიონის მიმდებარე ტერიტორიას ამჟამად „ბერკუტი“ აკონტროლებს.