-
2014-01-20 16:37
ლანჩხუთის რაიონის სოფელ ნიგვზიანის საჯარო სკოლის ადმინისტრაციის თანამშრომლებსა და პედაგოგებს ხუთი თვეა, ხელფასი არ აუღიათ.
აღნიშნულ ინფორმაციას პედაგოგ ლადო აფხაზავაზე დაყრდნობით „ზონანიუსი“ ავრცელებს, რომელიც თვითონ აფხაზავასაც დაუკავშირდა.
ლადო აფხაზავამ „ფეისბუქის“ საკუთარ გვერდზე დაწერა, რომ არათუ გაზრდილი, ძველი ხელფასიც არ აუღია და ამის გამო, იძულებულია, სკოლა დატოვოს. აფხაზავა წერს, რომ უკვე მეხუთე თვე დაიწყო, რაც ხელფასი არ აუღიათ არც დირექტორს, არც სასწავლო ნაწილის გამგეს, არც სხვა პედაგოგებს:
„14 წელია, სკოლაში ვმუშაობ, არა, ჯერ არ ამომიწურია ჩემი შესაძლებლობები, პირიქით, უფრო ბევრი რამ წინ არის, რადგან არასდროს შემიჩერებია ჩემი პროფესიული განათლება, იძულებული ვარ სკოლა დავტოვო , სადაც ყველა ძალიან მიყვარს,ძალიან შემიყვარდა ის მოსწავლეები, რომელთანაც სულ რამდენიმე თვე ვიმუშავე, მოხალისეობრივად ძალიან ბევრი ვიმუშავე, და არც ჩემი თანასოფლელ ბავშვებს ვეტყვი უარს,მაგრამ ამ დროში ძალიან ძნელი დარჩა, ხუთი თვე ხელფასს რომ ვერ აიღებ, იქ არ ხარ საჭირო.
ცუდია ამ სფეროში პედაგოგების აგდება და მოტყუება რომ დაიწყეს. ჯერ არცერთ დირექტორს და სასწავლო ნაწილს, დამლაგებელს, ბუღალტერს, დარაჯს, საინფორმაციო მენეჯერს არ აუღია მომატებული ხელფასი და ეს ხუთი თვე გრძელდება, იქნებ ხმა ამოიღოთ მასწავლებლებო“, - წერს ლადო აფხაზავა, რასაც „ზონანიუსთან“ საუბარშიც ადასტურებს და მასწავლებლებს „ხმის ამოღებისკენ“ მოუწოდებს.