თბილისის ცენტრში მდებარე იტალიურ ეზოში ხმაური და დაპირისპირება მოჰყვა საპატრულო პოლიციის მიერ პენსიონერი მამაკაცისთვის 150 ლარიანი ჯარიმის გამოწერას ეზოში ლუდის დალევის გამო. დაპირისპირების განსამუხტავად ადგილზე პოლიციის კიდევ ორი ეკიპაჟი მივიდა.
მეზობლები აცხადებენ, რომ პატრულმა პენსიონერი, რომელსაც მარკეტში ნისიად აღებული ერთი ბოთლი ლუდი ეჭირა ხელში და ეზოში შესასვლელ თაღთან სვამდა, ქუჩიდან შენიშნეს და მასთან მივიდნენ. მას შემდეგ, რაც შეიტყო, რომ დაჯარიმებას უპირებდნენ, მამაკაცი ეზოში შევიდა, პოლიციელები კი მას სახლში შესვლის ნებას არ აძლევდნენ.
ხმაურზე გარეთ მამაკაცის მეზობლები გამოვიდნენ. ოცდაათამდე ადგილობრივი პოლიციელთა მოქმედებას აღშფოთებით შეხვდა. მეზობლების თქმით, ამის შემდეგ პოლიციელებმა დამატებით ორი ეკიპაჟი გამოიძახეს. ერთერთმა პოლიციელმა პენსიონერ მამაკაცს ხელი გადაუგრიხა, როცა ის კიბეზე ასვლას და სახლში შესვლას ცდილობდა.
ინციდენტის თვითმხილველი, პენსიონერის მეზობელი მამაკაცი ამბობს, რომ დაინტერესდა, რა კრიტერიუმის მიხედვით გამოუწერეს ჯარიმა 150 ლარი პენსიონერს, რომელსაც პენსია 155 ლარი აქვს, ხოლო საარსებო მინიმუმი 160 ლარს უტოლდება, მით უმეტეს, რომ აღნიშნული სამართალდარღვევისთვის (ალკოჰოლის მიღება საზოგადოებრივი თავშეყრის ადგილას) ადმინისტრაციული კოდექსი 50-დან 150 ლარამდე ჯარიმას ითვალისწინებს.
მისი განცხადებით, შესაბამისი შეკითხვით იმ პოლიციელს მიმართა, რომელიც ოქმს ადგენდა, პასუხად კი მიიღო: "ეს ჩემს დილიხორზეა, თუ არ მოგწონს, წადი და კრემლში მიჩივლე...".
