-
2014-01-18 17:09
საქართველოს რკინიგზამ წელს, შარშანდელთან შედარებით, 2 996 983 ტონით ნაკლები ტვირთი გადაზიდა.
– ინფორმაციას ამის შესახებ, სტატისტიკურ მონაცემებზე დაყრდნობით, „საქართველოს რკინიგზის“ ყოფილი სპეციალისტი ირმა სტეფნაძე აქვეყნებს.
მისივე ინფორმაციით, ნავთობი და ნავთობ პროდუქტები 1 249 810 ტონით ნაკლები, ხოლო მშრალი ტვირთი 1 747 173 ტონით ნაკლები გადაიზიდა.
ირმა სტეფნაძე იმასაც განმარტავს, რას ნიშნავს ამ რაოდენობით ტვირთის გადაზიდვის შემცირება:
„ეს ნიშნავს, რომ 3 000 000- მდე ტონა ტვირთის მფლობელმა კომპანიამ (ან კომპანიებმა) აღარ აირჩია/აირჩიეს საქართველოს რკინიგზა, აღარ ანდო/ანდეს რა მას ტვირთის გადაზიდვა, აღარ ენდო საქართველოს სატრანსპორტო კორიდორს და ტვირთის გადასაზიდად სხვა სატრანსპორტო კორიდორი აირჩია...
საქართველოს რკინიგზის არასწორი მენეჯმენტი საფრთხის ქვეშ აყენებს საქართველოს, როგორც საერთაშორისო სატრანსპორტო ჰაბის, საქართველოს, როგორც სატრანსპორტო კორიდორის იდეას!
გარდა ამისა, ეს ნიშნავს: რკინიგზის შემოსავლების მკვეთრ შემცირებას!
ეს ნიშნავს: რკინიგზაში დასაქმებული 14 000 ადამიანის ხელფასებისათვის საფრთხის შექმნას!
ეს ნიშნავს: რკინიგზაზე მიბმული საწარმოებისათვის (თბილისის ელექტროვაგონშემკეთებელი ქარხანა, რუსთავის ვაგონმშენებელი ქარხანა, თბილისის ელმავალმშენებელი ქარხანა, რკინაბეტონის შპალების ქარხანა, ღორღის, შპალების და სხვა უამრავი საწარმო) ნაკლები შეკვეთის მიცემას!
ეს ნიშნავს: რკინიგზის მიერ არაპირდაპირ დასაქმებული 35 000 ადამიანის შემოსავლების შემცირებას!
ეს ნიშნავს: რკინიგზის მიერ საერთაშორისო ბირჟებზე განთავსებული ფასიანი ქაღალდების ფასის დაცემას!
ეს ნიშნავს, რომ საქართველოს რკინიგზამ წელს ბევრად ნაკლები გადასახადი გადაიხადა ბიუჯეტში!
ეს ნიშნავს, რომ ინგრევა ერთ-ერთი ყველაზე წარმატებული და მზარდი ავტორიტეტის კომპანია და მას შველა სჭირდება!“, – წერს ირმა სტეფნაძე.