-
2014-01-18 16:13
ივანე ჯავახიშვილის სახელობის თბილისის სახელმწიფო უნივერსიტეტში რუსი პროფესორის ლექცია პარასკევს, 24 იანვარს ჩატარდება.
ლექცია თემაზე „რუსეთის ეკონომიკის მეოთხე ვექტორი“ თსუ–ს მაღლივ კორპუსში, ეკონომიკისა და ბიზნესის ფაკულტეტის ბიბლიოთეკაში გაიმართება.
ლექციას რუსეთის მეცნიერებათა აკადემიის წევრ–კორესპონდენტი, ამავე აკადემიის ეკონომიკის ინსტიტუტის დირექტორის პირველი მოადგილე, რუსეთის ფედერაციის მთავრობათან არსებული საფინანსო უნივერსიტეტის მაკროეკონომიკური რეგულირების კათედრის ხელმძღვანელი, პროფესორი დიმიტრი სოროკინი წაიკითხავს.
შესაბამისი განცხადება, საჯარო ლექციის ადგილის მითითებით თსუ–ს ოფიციალურ ვებ–გვერდზეა გამოქვეყნებული.
თსუ–ში რუსი პროფესორების ლექციების თემას გამოეხმაურა საპარლამენტო უმცირესობის წევრი გიორგი კანდელაკი:
„აი, მგონი უმაღლეს განათლებაშიც იწყებს სამართლიანობა აღდგენას, გია ჟორჟოლიანი რომ მოითხოვდა.
მისაღებ გამოცდებზე რუსეთში არსებული მექრთამეობის, მისაღები კომისიების წევრებთან რეპეტიტორობის და ჩაწყობის ინსტიტუტებზეც, იმედია ბატონი სოროკინი გაგვიზიარებს რუსეთში დაგროვილ ღირსეულ გამოცდილებას, როგორც ლექციაზე, ასევე ლექციის შემდეგ ქეიფზე რესტორანში, რომელზეც მას მასპინძლები აუცილებლად დაპატიჟებენ“, – წერს კანდელაკი „ფეისბუქში“.