ამიოტროფული გვერდითი სკლეროზი (Amyotrophic lateral sclerosis (ALS), იგივე ლუ გერიგის დაავადება - ასე ჰქვია ავადმყოფობას, რომლითაც დაავადებულთა დასახმარებლად არსებობს ერთიანი ფონდი და სახალისო, საქველმოქმედო ფლეშმობი-გამოწვევა, სადაც მთელი მსოფლიოს ცნობილი სახეები ჩაერთნენ.
ლუ გერიგი ამერიკელი ბეისბოლისტი იყო, რომელიც 1939 წელს ამ დაავადების გამო გარდაიცვალა. ამიოტროფული ლატერალური სკლეროზი, როგორც ერთერთი ნეიროდეგენერაციული დაავადება, იწვევს კუნთების დასუსტებას. ეს დაავადება ზედა და ქვედა მოტორული ნეირონების დეგენერაციის გზით იწვევს მათ სრულ კვდომას, ისინი ვეღარ აწვდიან კუნთებს სიგნალს.
ფუნქციადაკარგული კუნთები სუსტდებიან და ბოლოს ხდება მათი მთლიანი ატროფირება. ამიოტროფული გვერდითი სკლეროზით დაავადებულ პაციენტებს, მიუხედავად იმისა, რომ ტვინი ვეღარ აკონტროლებს ნებით მოძრაობებს, გააჩნიათ იგივე გონებრივი უნარი, მეხსიერება და პიროვნულობა, რაც დაავადებამდე ჰქონდათ.
ფლეშმობი Ice Bucket Challenge, რომელიც აღნიშნული დაავადების მქონეთა დასახმარებლად მოიფიქრეს, გულისხმობს ცივი, გაყინული წყლის გადასხმას, ვიდეოს გადაღებას და გაშრობის შემდეგ თანხის გადარიცხვას თანადგომის ფონდში. ამასთან, ფლეშმობი გულისხმობს სამი მეგობრებისთვის ანალოგიური გამოწვევის გაგზავნას და შეთავაზებას, გადაივლონ ცივი წყალი თავზე ან გადარიცხონ თანხა.
ფლეშმობი მთელ მსოფლიოში დიდი პოპულარობით სარგებლობს და მასში უკვე ჩაერთნენ ისეთი ცნობილი ადამიანები, როგორებიც არიან ჯორჯ ბუში, ბილ გეიტსი, მარკ ცუკერბერგი, სტივენ სპილბერგი, მიკი რურკი, ლედი გაგა, ბრიტნი სპირსი, ჯასტინ თიმბერლეიკი და სხვები.
ფლეშმობისადმი ინტერესი საქართველოშიც გამოიჩინეს, თუმცა, თავისებური ინტერპრეტაციით: აქ გამოწვევას უფრო ხშირად არა მეგობრებს, არამედ მთავრობის წევრებსა და პოლიტიკოსებს უგზავნიან. გამოწვევა უკვე მიიღეს ირაკლი ღარიბაშვილმა, კახა კალაძემ და სხვებმა.