კიევში, ევრომოედანზე მიმდინარე აქციის დაშლის შემდეგ უკრაინის ოპოზიციურმა ძალებმა მიიღეს გადაწყვეტილება, რომ შეიქმნება წინააღმდეგობის ერთიანი ფრონტი.
ერთიანი ფრონტი მთელი ქვეყნის მასშტაბით გაფიცვებსა და სხვა საპროტესტო გამოსვლებს გაუწევს კოორდინაციას, იგეგმება სახელისუფლებო შენობების პიკეტირება როგორც კიევში, ასევე უკრაინის სხვა ქალაქებში.
ეს გადაწყვეტილება გაერთიანებულმა ოპოზციამ მას შემდეგ მიიღო, რაც დღეს, გამთენიისას უკრაინელმა სამართალდამცველებმა ევრომაიდანზე მიმდინარე აქცია დაარბიეს.
აქციის დაშლის დროს დაშავდა 50–დე ადამიანი, მათ შორის, ჟურნალისტებიც, რომლებსაც კლინიკებში დახმარება აღმოუჩინეს. ათეულობით ადამიანი ამ დრომდე საავადმყოფოში რჩება.
დაშავებულ ჟურნალისტებს შორისაა „როიტერის“ კავკასიის ბიუროს ოპერატორი დავით ჩხიკვიშვილი, რომელიც მიმდინარე მოვლენებს აშუქებდა:
„გუშინ გვიან ღამით, ჩვენ მოედანზე ვიღებდით აცქიას. სიტუაცია იყო ასეთი: ოპოზიციას მოჰყავდა ორი მიკროავტობუსი აუდიო–გახმოვანებისთვის და პოლიციამ გაუკეთა ბლოკირება. ხალხი ცდილობდა, გაენთავისუფლებინა, შემდეგ პოლიციასთან რაღაც შეტაკება მოუვიდათ. მერე მოვიდა სპეცრაზმის ნაწილი. ჩვენი ფოტოგრაფი დაშავდა იმიტომ, რომ თავში ხელკეტი მოხვდა და თავი გაუტეხეს. მე კი კამერა დამემტვრა“.– განაცხადა ჩხიკვიშვილმა.
