2013-11-27 12:48

საგარეო საქმეთა მინისტრი იმ ბერკეტებზე საუბრობს, რომლებსაც რუსეთი იყენებდა და, სავარაუდოდ, მომავალშიც გამოიყენებს საქართველოს წინააღმდეგ.

გადაცემაში „პოზიცია“ მაია ფანჯიკიძემ კიდევ ერთხელ გაუსვა ხაზი, რომ მავთულხლართების გავლების პროცესი 2011 წლიდან დაიწყო და სხვადასხვა ინტენსივობით გრძელდებოდა. მისი თქმით, საქართველომ, რუსეთის ქმედებების მიუხედავად, სიმშვიდე უნდა შეინარჩუნოს და რუსეთის პროვოკაციაზე არ წამოეგოს:

„ 2011 წლიდან მავთულხლართების გავლების პროცესი დაწყებულია, რომელიც სხვადასხვა ინტენსივობით ხან წყდება, ხან გრძელდება, ახლა სწორედ ასეთი ინტენსიური ფაზაა. მიუხედავად ამისა, ჩვენ ამ პროვოკაციას არ წამოვეგებით და შევინარჩუნებთ იმ სიმშვიდეს, რომლითაც გასული ერთი წლის განმავლობაში გამოვირჩეოდით. ვეცდებით, რომ არ მოხდეს სიტუაციის ესკალაცია. ასეთი იქნება ჩვენი პოლიტიკა,"- აცხადებს საგარეო უწყების ხელმძღვანელი.

მაია ფანჯიკიძის განცხადებით, შესაძლოა, რუსეთმა ისევ ეკონომიკური ბერკეტები აამოქმედოს, თუმცა, საქართველო არჩეულ კურსს მაინც არ გადაუხვევს:

„შეიძლება, ისევ დავუბრუნდეთ იმ მდგომარეობას, როდესაც გამოცხადებული იყო ემბარგო და ჩვენს შორის არ არსებობდა არანაირი ურთიერთობა. დარწმუნებული ვარ, რომ როგორც არ უნდა განვითარდეს მოვლენები, ჩვენ ამ ხელშეკრულებას სექტემბერში ხელს მოვაწერთ,"- აცხადებს მაია ფანჯიკიძე.