2013-11-25 22:07

უკრაინის პრეზიდენტის ადმინისტრაცია პრეზიდენტ იანუკოვიჩის განცხადებას ავრცელებს. ქვეყნის პირველი პირი დუმილს არღვევს და უკრაინის მოქალაქეებს მიმართავს.

„უახლოეს მომავალში მე მივცემ ვრცელ ინტერვიუს ტელეარხებს და ყველა კითხვას ვუპასუხებ, ახლა კი მინდა, უბრალოდ, ხაზი გავუსვა: უკრაინაში ევროპული სტანდარტების საზოგადოების ჩამოყალიბებას ალტერნატივა არა აქვს და ჩემი პოლიტიკა ამ მიმართულებით ყოველთვის იყო და იქნება თანმიმდევრული.

რეფორმები, რომლებსაც ჩვენ ვატარებთ, სწორედ იმის დადასტურებაა, რომ ჩვენ ევროპულ გზას ვადგავართ“, - აღნიშნულია განცხადებაში.

ვიქტორ იანუკოვიჩი უკრაინელებს სთხოვს, მოუსმინონ და დაუჯერონ და არწმუნებს მათ, რომ უკრაინის საწინააღმდეგო ნაბიჯი არასდროს გადაუდგამს და არაც აპირებს.

განცხადებაში აღნიშნულია:

„მე არ ვიქნებოდი მართალი, არ გამეკეთებინა ყველაფერი, რაც გასაკეთებელია, რათა ადამიანებმა არ დაკარგონ სამუშაო ადგილები, მიიღონ ანაზღაურება, პენსია და სტიპენდიები.

მე მინდა, რომ ჩვენს დიდ უკრაინულ ოჯახში მშვიდობამ დაისადგუროს. როგორც მამას არ შეუძლია, დატოვოს ოჯახი უპუროდ, მეც არ შემიძლია, ბედის ანაბარა დავტოვო ხალხი იმ პრობლემების წინაშე, რაც შესაძლოა წარმოიშვას, თუკი იმ ზეწოლის შედეგად, რასაც ჩვენ განვიცდით, გაჩერდება საწარმოები და მილიონობით ადამიანი დარჩება ქუჩაში.

ამიტომაც მე მიწევს, მივიღო არც ისე ადვილი გადაწყვეტილებები. სწორედ ამიტომ მიწევს გარისკვა და ზოგჯერ ჩემი ქმედება გაუგებარია.

და სწორედ ამიტომ ვთხოვ დღეს მე ჩვენს ხალხს, ყურადღებით მომისმინოს პირადად მე.

მე არასდროს გადავდგამ ერთ ნაბიჯსაც კი უკრაინისა და ხალხის საზიანოდ. უკრაინელი ხალხის ნება იყო, არის და იქნება გადამწყვეტი ფაქტორი ჩემთვის, ნებისმიერი გადაწყვეტილების მიღებისას. მინდა, რომ ხალხმა იცოდეს ეს.

ყველას ვუხდი მადლობას მაღალი სამოქალაქო შეგნების გამოვლენისთვის. სატელევიზიო ინტერვიუში მე უფრო დეტალურად მოვყვები ჩვენი საერთო ნაბიჯებისა და მოქმედებების შესახებ, რომლებსაც ჩვენ ერთად გადავდგამთ.

თქვენი გაგებისა და მხარდაჭერის იმედი მაქვს.

მე მჯერა - ჩვენ ერთად გადავლახავთ ყველა სიძნელეს ჩვენი სახელმწიფოს განვითარების გზაზე, რადგან არ არსებობს ბარიერი, რომელსაც ბრძენი, ერთ მუშტად შეკრული ხალხი ვერ გადალახავს.

ჩვენ არასდროს, არავის უნდა მივცეთ უფლება, ხელი შეგვიშალოს. მილიონთა ლოცვა და ოცნება ღვთის ნებას ეფუძნება“, - ნათქვამია იანუკოვიჩის მიმართვაში.